പൃഥ്വിരാജ് സുകുമാരനെ നായകനാക്കി ആക്ഷൻ ചിത്രം സംവിധാനം ചെയ്യാൻ ആഗ്രഹം: ഗോകുൽ സുരേഷ്

പ്രശസ്ത നടൻ സുരേഷ് ഗോപിയുടെ മകൻ ആയ ഗോകുൽ സുരേഷ് ഇപ്പോൾ വ്യത്യസ്ത വേഷങ്ങളിലൂടെ മലയാള സിനിമാ പ്രേക്ഷകരുടെ മനസ്സിൽ ഇടം നേടിക്കൊണ്ടിരിക്കുകയാണ്. ഗോകുൽ നായകനായ ഉൾട്ട എന്ന ചിത്രം ഉടൻ തന്നെ റിലീസിനും എത്തുകയാണ്. ഇപ്പോൾ തന്നെ നായകനായും സഹനടൻ ആയുമെല്ലാം അഭിനയിച്ചു തന്റെ പ്രതിഭ തെളിയിച്ചു കൊണ്ടിരിക്കുന്ന ഗോകുൽ പറയുന്നത് തനിക്കു സംവിധായകൻ ആവാൻ ആയിരുന്നു ആഗ്രഹം എന്നാണ്. അഭിനേതാവ് എന്ന നിലയിൽ താൻ ചെയ്യുന്ന ജോലിയെ ഏറെ സ്നേഹിക്കുന്നു എങ്കിലും അതിനോടൊപ്പം സിനിമാ സംവിധായകൻ ആവാൻ കൂടി കൂടുതൽ പഠിക്കാൻ ശ്രമിക്കുന്നുണ്ട് എന്നും പറയുന്നു. ഓരോ സെറ്റിൽ നിന്നും സിനിമയെ കുറിച്ച് കൂടുതൽ പഠിക്കാൻ ശ്രമിക്കാറുണ്ട് എന്നും ഉടനെ അല്ലെങ്കിലും ഒരു ചിത്രം ഒരുക്കാൻ താല്പര്യം ഉണ്ടെന്നും ഗോകുൽ പറയുന്നു.

താൻ ആക്ഷൻ ചിത്രങ്ങളുടെ ആരാധകൻ ആണെന്നും അതുകൊണ്ടുതന്നെ ഒരു ആക്ഷൻ ചിത്രമാണ് സംവിധാനം ചെയ്യാൻ താല്പര്യം എന്നും ഗോകുൽ പറയുന്നു. പൃഥ്വിരാജ് സുകുമാരന്റെ കടുത്ത ആരാധകൻ ആണ് താൻ എന്നും തന്റെ മനസ്സിൽ താൻ സംവിധാനം ചെയ്യാൻ പോകുന്ന ചിത്രത്തിലെ ഹീറോ പൃഥ്വിരാജ് ആണെന്നും ഗോകുൽ വെളിപ്പെടുത്തി. അച്ഛന്റെ ചിത്രം മേൽവിലാസം റിലീസ് ആയപ്പോഴും താൻ തീയേറ്ററിൽ പോയി കണ്ടത് പൃഥ്വിരാജ് ചിത്രം ആണെന്നും അത്ര ആരാധന അദ്ദേഹത്തോട് ഉണ്ടെന്നും ഗോകുൽ സുരേഷ് പറഞ്ഞു. ഷാജി കൈലാസ് ഒക്കെ ഒരുക്കിയ പഴയ ആക്ഷൻ ചിത്രങ്ങളും അതോടൊപ്പം ഇന്നത്തെ കാലത്തേ ചിത്രങ്ങളും ഏറെ കാണാൻ ശ്രമിക്കുന്ന തനിക്കു ഒരു പത്തോ പതിനഞ്ചോ കൊല്ലം കഴിഞ്ഞു ആണ് ചിത്രം സംവിധാനം ചെയ്യാൻ ആഗ്രഹം എന്നും ഗോകുൽ പറയുന്നു. കൂടുതൽ പക്വതയും സിനിമാ മേഖലയിൽ പരിചയ സമ്പത്തും ഉണ്ടാക്കിയിട്ട് വേണം സംവിധായകൻ ആവാൻ എന്ന പക്ഷക്കാരനാണ് ഗോകുൽ സുരേഷ്.