ജൂനിയർ ചാക്കോച്ചി ലുക്കിൽ ഗോകുൽ സുരേഷ്; സുരേഷ് ഗോപിയെ അനുസ്മരിപ്പിച്ചു സൂത്രക്കാരനിൽ മകന്റെ വേഷപ്പകർച്ച..!

ആക്ഷൻ സൂപ്പർ സ്റ്റാർ ആയ സുരേഷ് ഗോപിയുടെ പഴയ ചിത്രങ്ങളും കഥാപാത്രങ്ങളും ഇന്നും നെഞ്ചോട് ചേർക്കുന്നവരാണ് ഓരോ മലയാളിയും. അദ്ദേഹത്തിന്റെ തീപ്പൊരി കഥാപാത്രങ്ങൾ എന്നും ആരാധകരെയും സിനിമാ പ്രേമികളെയും ത്രസിപ്പിച്ചിട്ടുള്ളവയും ആണ്. ഇപ്പോൾ സൂപ്പർ ഹിറ്റ് ചിത്രമായ ലേലത്തിന്റെ രണ്ടാം ഭാഗത്തിലൂടെ, പ്രേക്ഷകരുടെ പ്രീയപ്പെട്ട ആനക്കാട്ടിൽ ചാക്കോച്ചി ആയി വമ്പൻ തിരിച്ചു വരവിനൊരുങ്ങുകയാണ് സുരേഷ് ഗോപി. ഈ അവസരത്തിലാണ് കഴിഞ്ഞ ദിവസം സുരേഷ് ഗോപിയുടെ മകനും യുവ നടനുമായ ഗോകുൽ സുരേഷിന്റെ ഒരു പുതിയ ഫോട്ടോ സോഷ്യൽ മീഡിയയിൽ തരംഗമായതു. മുണ്ടു മടക്കി കുത്തി ഷർട്ടിന്റെ കൈകൾ തെറുത്തു കയറ്റി നിൽക്കുന്ന ഗോകുൽ സുരേഷിന്റെ ആ ചിത്രം കണ്ടാൽ ആദ്യം മനസ്സിൽ ഓടിയെത്തുന്നത് സുരേഷ് ഗോപിയുടെ ചാക്കോച്ചി എന്ന കഥാപാത്രമാണ്.

ജൂനിയർ ചാക്കോച്ചി എന്ന് ഇപ്പോഴേ സോഷ്യൽ മീഡിയ ഗോകുൽ സുരേഷിനെ വിളിച്ചും തുടങ്ങി . ഗോകുൽ സുരേഷ് ഇപ്പോൾ അഭിനയിച്ചു കൊണ്ടിരിക്കുന്ന സൂത്രക്കാരൻ എന്ന സിനിമയിലെ ലുക്ക് ആണ് അത്. പക്ഷെ ഈ ലുക്ക് കണ്ടതോടെ ചിലരെങ്കിലും ലേലം 2 ഇൽ ചാക്കോച്ചിക്കൊപ്പം ഈ കിടിലൻ ലുക്കിൽ ജൂനിയർ ചാക്കോച്ചിയെയും പ്രതീക്ഷിച്ചാൽ അത്ഭുതപ്പെടാൻ ഇല്ല. അത്രയധികം സുരേഷ് ഗോപിയെ അനുസ്മരിപ്പിക്കുന്നുണ്ട് മകനായ ഗോകുൽ സുരേഷ്. മുഖച്ഛായ കൊണ്ടും ശരീര ഭാഷയിലും ആ സാമ്യം വ്യക്തമാണ്. മുത്തുഗൗ എന്ന ചിത്രത്തിലൂടെ മലയാള സിനിമയിൽ അരങ്ങേറിയ ഗോകുൽ സുരേഷിനെ നമ്മൾ പിന്നീട് ഇര, മാസ്റ്റർപീസ് എന്നീ ചിത്രങ്ങളിലും കണ്ടു. കൂടുതൽ നായക , സഹനായക വേഷങ്ങളിലൂടെ മലയാള സിനിമയിൽ സജീവമാകാൻ ഒരുങ്ങുകയാണ് ഗോകുൽ സുരേഷ്. സുരേഷ് ഗോപിയുടെ ലേലം 2 ഈ വർഷം തന്നെ ചിത്രീകരണം ആരംഭിക്കും. നിതിൻ രഞ്ജി പണിക്കർ ആണ് ഈ ചിത്രം ഒരുക്കുന്നത്.