ജെസ്സി വരും, കാർത്തിക് വരുമോ?; വിണ്ണൈത്താണ്ടി വരുവായയുടെ രണ്ടാം ഭാഗത്തെ കുറിച്ച് വെളിപ്പെടുത്തി ഗൗതം മേനോൻ..

തെന്നിന്ത്യയിലെ ഏറ്റവും മികച്ച പ്രണയ ചിത്രങ്ങളുടെ അമരക്കാരനാണ് ഗൗതം വാസുദേവ് മേനോനെന്ന മാസ്റ്റർ ഡയറക്ടർ. ഒട്ടേറെ സൂപ്പർ ഹിറ്റ് ചിത്രങ്ങൾ നമ്മുക്ക് സമ്മാനിച്ചിട്ടുള്ള അദ്ദേഹത്തിന്റെ കരിയറിലെ ഏറ്റവും മികച്ച ചിത്രങ്ങളിൽ ഒന്നായിരുന്നു ചിമ്പു, തൃഷ എന്നിവർ നായകനും നായികയുമായി എത്തിയ വിണ്ണൈത്താണ്ടി വരുവായ എന്ന റൊമാന്റിക് ഡ്രാമ. തെന്നിന്ത്യ മുഴുവൻ തരംഗമായി മാറിയ ആ ചിത്രത്തിന് ഒരു രണ്ടാം ഭാഗം വരുമെന്ന റിപ്പോർട്ടുകൾ ഉണ്ടായിരുന്നു. ഇപ്പോഴിതാ ആ രണ്ടാം ഭാഗത്തെ കുറിച്ച് കൂടുതൽ വെളിപ്പെടുത്തലുകളുമായി മുന്നോട്ടു വന്നിരിക്കുകയാണ് സംവിധായകൻ ഗൗതം മേനോൻ. ചിത്രത്തിന്റെ തിരക്കഥ റെഡിയാണ് എന്നും ഒട്ടേറെ മികച്ച ആശയങ്ങൾ ചിത്രത്തിനായി തയ്യാറായി ഇരിക്കുകയാണെന്നും അദ്ദേഹം പറഞ്ഞു. ജെസ്സിയായി വരാൻ തൃഷ റെഡിയാണെന്നും എന്നാൽ കാർത്തിക് ആയി വരാൻ ചിമ്പു റെഡി ആയാൽ മാത്രമേ രണ്ടാം ഭാഗം സംഭവിക്കു എന്നും അദ്ദേഹം വെളിപ്പെടുത്തുന്നു. കാരണം രണ്ടാം ഭാഗത്തിന്റെ കഥ വികസിക്കുന്നത് കൂടുതലും കാർത്തിക്കിലൂടെയാണ് എന്നാണ് അദ്ദേഹം പറയുന്നത്.

ചിമ്പു ഇപ്പോൾ മറ്റു ചിത്രങ്ങളുടെ തിരക്കിലാണ് എന്നും അതുകൊണ്ട് തന്നെ കാർത്തിക് ആയുള്ള മേക് ഓവറിൽ എത്താൻ അദ്ദേഹം തയ്യാറായാൽ മാത്രമേ വിണ്ണൈത്താണ്ടി വരുവായയുടെ രണ്ടാം ഭാഗം തനിക്കൊരുക്കൻ സാധിക്കു എന്നാണ് ഗൗതം മേനോൻ പറയുന്നത്. താനിപ്പോൾ മൂന്ന് തമിഴ് ചിത്രങ്ങളുടെ തിരക്കിലാണ് എന്നും അദ്ദേഹം പറഞ്ഞു. ഒരു നടനെന്ന നിലയിൽ കൂടി ഗൗതം മേനോൻ കയ്യടി നേടിയ വർഷമാണ് ഇത്. ഫഹദ് ഫാസിൽ- അൻവർ റഷീദ് ചിത്രമായ ട്രാൻസിൽ വില്ലനായി അഭിനയിച്ചു കയ്യടി നേടിയ ഗൗതം മേനോൻ, ദുൽകർ സൽമാൻ നായകനായ കണ്ണും കണ്ണും കൊള്ളയ് അടിത്താൽ എന്ന തമിഴ് ചിത്രത്തിലെ പ്രകടനത്തിലൂടെയും ഒരുപാട് പ്രശംസ നേടിയെടുത്തു. വിക്രം നായകനായ ധ്രുവ നച്ചത്തിരമാണ് പ്രേക്ഷകർ ഇനി ഏറെ പ്രതീക്ഷയോടെ കാത്തിരിക്കുന്ന ഗൗതം വാസുദേവ് മേനോൻ ചിത്രം.