ഫോറെൻസിക്കിന്റെ ആദ്യ ടീസർ ലോഞ്ച് ചെയ്യാൻ പൃഥ്വിരാജ് സുകുമാരൻ

യുവ താരം ടോവിനോ തോമസ് നായകനായി എത്തുന്ന പുതിയ ചിത്രമാണ് ഫോറൻസിക്. സെവൻത് ഡേ എന്ന സൂപ്പർ ഹിറ്റ് പൃഥ്വിരാജ് ചിത്രം രചിച്ച അഖിൽ പോളും അനസ് ഖാനും ചേർന്ന് സംവിധാനം ചെയ്ത ഈ ത്രില്ലർ ചിത്രം രചിച്ചിരിക്കുന്നതും സംവിധായകർ തന്നെയാണ്. നാവിസ് സേവ്യർ, സിജു മാത്യു എന്നിവർ ചേർന്ന് ജൂവിസ് പ്രൊഡക്ഷൻസിന്റെ ബാനറിൽ നിർമിക്കുന്ന ഈ ചിത്രത്തിന്റെ ടീസർ ഈ മാസം ഇരുപത്തിയൊന്നാം തീയതി എത്തുകയാണ്. യുവ സൂപ്പർ താരം പൃഥ്വിരാജ് സുകുമാരനാണ് ഈ ചിത്രത്തിന്റെ ആദ്യ ടീസർ ലോഞ്ച് ചെയ്യാൻ പോകുന്നത്. അന്നേ ദിവസം ഉച്ചക്ക് രണ്ടു മണിക്കാണ് ഈ ടീസർ പുറത്തു വരിക.

ടോവിനോ ഒരു ഫോറൻസിക് ഓഫിസർ ആയി എത്തുന്ന ഈ ചിത്രത്തിലെ നായികാ വേഷം ചെയ്യുന്നത് മമത മോഹൻദാസ് ആണ്. ഒരു പോലീസ് ഓഫീസർ ആയാണ് മമത മോഹൻദാസ് ഈ ചിത്രത്തിൽ അഭിനയിച്ചിരിക്കുന്നത്. അഖിൽ ജോർജ് ക്യാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ജേക്സ് ബിജോയിയും ഈ ചിത്രം എഡിറ്റ് ചെയ്യുന്നത് ഷമീർ മുഹമ്മദും ആണ്. നേരത്തെ പ്രശസ്ത ഛായാഗ്രാഹകനും സംവിധായകനുമായ സുജിത് വാസുദേവ് ആയിരുന്നു ഈ ചിത്രമൊരുക്കാൻ തീരുമാനിച്ചിരുന്നത്. എന്നാൽ തിരക്കുകൾ മൂലം അദ്ദേഹം പിന്നീട് പിന്മാറി. ജേക്കബിന്റെ സ്വർഗ്ഗ രാജ്യം, പൈപ്പിൻ ചുവട്ടിലെ പ്രണയം, ബിഗിൽ എന്നീ ചിത്രങ്ങളിലൂടെ ശ്രദ്ധ നേടിയ റീബ മോണിക്ക ജോണും ലില്ലി എന്ന ചിത്രത്തിലൂടെ ശ്രദ്ധേയനായ ധനേഷ് ആനന്ദും ഈ ചിത്രത്തിൽ നിർണ്ണായക വേഷങ്ങൾ ചെയ്യുന്നുണ്ട്. മാർച്ചിൽ ആവും ഫോറൻസിക് റിലീസ് ചെയ്യുക എന്നാണ് റിപ്പോർട്ടുകൾ പറയുന്നത്.