ഒരു മില്യൺ വ്യൂസിനെക്കാളും വിലയേറിയ വാക്കുകൾ; പൃഥ്വിരാജിനു നന്ദി പറഞ്ഞു ഫോറൻസിക് സംവിധായകൻ

പൃഥ്വിരാജ് സുകുമാരനെ നായകനാക്കി ശ്യാം ധർ സംവിധാനം ചെയ്ത സെവൻത് ഡേ എന്ന ചിത്രം രചിച്ചു കൊണ്ട് മലയാള സിനിമയിൽ അരങ്ങേറ്റം കുറിച്ച ആളാണ് അഖിൽ പോൾ. അഖിൽ പോളും അനസ് ഖാനും ചേർന്നു ആദ്യമായി സംവിധാനം ചെയ്യുന്ന ഫോറൻസിക് എന്ന ചിത്രം അടുത്ത മാസം റിലീസ് ചെയ്യാൻ പോവുകയാണ്. ഈ ചിത്രത്തിന്റെ ട്രയ്ലർ കഴിഞ്ഞ ദിവസം റീലീസ് ചെയ്യുകയും വലിയ പ്രേക്ഷക ശ്രദ്ധ നേടിയെടുക്കുകയും ചെയ്തു. ഇപ്പോൾ ആ ട്രയ്ലർ കണ്ട് പൃഥ്വിരാജ് പറഞ്ഞ വാക്കുകൾ ഷെയർ ചെയ്തു കൊണ്ട് അഖിൽ പോൾ തന്റെ ഫേസ്ബുക്ക് പേജിലിട്ട പോസ്റ്റ് ഏവരുടെയും ശ്രദ്ധ നേടുകയാണ്. ഒരു മില്യണ് വ്യൂസ് തന്റെ ചിത്രത്തിന്റെ ട്രയ്ലർ നേടിയാലും ലഭിക്കാത്ത സന്തോഷവും വിലയുമാണ് പൃഥ്വിരാജിന്റെ ഈ വാക്കുകൾക്ക് എന്നാണ് അഖിൽ പറയുന്നത്.

ട്രയ്ലർ കണ്ട പൃഥ്വിരാജ് അഖിലിന് വാട്സ്ആപ് സന്ദേശമയച്ചത് ചിത്രം വളരെ നന്നായി ഒരുക്കിയിട്ടുണ്ട് എന്നും അഖിലിനെ ഓർത്തു അഭിമാനിക്കുന്നു എന്നുമാണ്. ടോവിനോ തോമസ് നായകനായി എത്തുന്ന ഈ ചിത്രത്തിൽ നായികാ വേഷം ചെയ്യുന്നത് മമത മോഹൻദാസ് ആണ്. സാമുവൽ ജോണ് എന്ന ഫോറൻസിക് ഉദ്യോഗസ്ഥനായാണ് ടോവിനോ തോമസ് ഈ ചിത്രത്തിലഭിനയിക്കുന്നത്. ഇവർക്കൊപ്പം രഞ്ജി പണിക്കർ, സൈജു കുറുപ്പ്, റീബ മോണിക്ക ജോണ്, ധനേഷ് ആനന്ദ് എന്നിവരും ഈ ചിത്രത്തിൽ അഭിനയിക്കുന്നുണ്ട്. ജൂവിസ് പ്രൊഡക്ഷൻസിന്റെ ബാനറിൽ നാവിസ് സേവ്യർ, സിജു മാത്യു എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിന് ക്യാമറ ചലിപ്പിച്ചിരിക്കുന്നതു അഖിൽ ജോര്ജും, സംഗീതം ഒരുക്കിയിരിക്കുന്നത് ജേക്സ് ബിജോയിയും ആണ്.