മോഹൻലാൽ സംവിധാനം ചെയ്യുന്ന ബറോസിന്റെ ടീസർ ഒരുങ്ങുന്നു..!

മലയാളത്തിന്റെ മഹാനടൻ മോഹൻലാൽ ആദ്യമായി സംവിധാനം ചെയ്യുന്ന ചിത്രമാണ് ബറോസ്: നിധി കാക്കും ഭൂതം. ഒരു ത്രീഡി ഫാന്റസി ഡ്രാമയായി വമ്പൻ ബഡ്ജറ്റിൽ ഒരുങ്ങുന്ന ഈ ചിത്രം രചിച്ചിരിക്കുന്നത് ജിജോ പുന്നൂസും നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരുമാണ്. മോഹൻലാൽ തന്നെ ടൈറ്റിൽ കഥാപാത്രത്തെ അവതരിപ്പിക്കുന്ന ഈ ചിത്രത്തിന്റെ ഷൂട്ടിംഗ് ഈ കഴിഞ്ഞ മാർച്ച് മുപ്പത്തിയൊന്നു മുതൽ കൊച്ചിയിൽ ആണ് ആരംഭിച്ചത്. അതിനു ശേഷം ഗോവയിലേക്ക് ആയിരുന്നു ചിത്രീകരണം മാറ്റേണ്ടത് എങ്കിലും കോവിഡ് പ്രതിസന്ധി മൂലം ഗോവൻ ഷെഡ്യൂൾ ഇതുവരെ ആരംഭിച്ചിട്ടില്ല. എന്നാൽ ഷൂട്ട് ചെയ്ത ഭാഗങ്ങളുടെ പോസ്റ്റ് പ്രൊഡക്ഷൻ ജോലികളും ഇപ്പോൾ നടന്നു കൊണ്ടിരിക്കുന്നുണ്ട്. ലഭിക്കുന്ന റിപ്പോർട്ടുകൾ ശരിയാണെങ്കിൽ, ഈ ചിത്രത്തിന്റെ ഒരു ടീസർ അണിയറയിൽ ഒരുങ്ങുകയാണ്. ഒരുപാട് വൈകാതെ ബറോസിന്റെ ആദ്യ ടീസർ പുറത്തു വിടും എന്നാണ് സൂചന.

യുവ സൂപ്പർ താരം പൃഥ്വിരാജ് സുകുമാരനും അഭിനയിക്കുന്ന ഈ ചിത്രത്തിലെ താരങ്ങളിൽ കൂടുതൽ പേരും സ്പെയിൻ, അമേരിക്ക, ഘാന, പോർട്ടുഗൽ എന്നിവിടങ്ങളിൽ നിന്നുള്ളവരാണ്. സന്തോഷ് ശിവൻ ക്യാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ലിഡിയൻ നാദസ്വരവും എഡിറ്റ് ചെയ്യുന്നത് ശ്രീകർ പ്രസാദുമാണ്. വി എഫ് എക്സ്ഉം ആക്ഷനും എല്ലാം നിറഞ്ഞ ഈ ചിത്രത്തിൽ നാനൂറു വർഷം പ്രായമുള്ള ബറോസ് എന്ന് പേരുള്ള ഒരു ഭൂതമായാണ് മോഹൻലാൽ അഭിനയിക്കുന്നത്. ഷൈല മകഫ്രി എന്ന അമേരിക്കൻ പെൺകുട്ടിയാണ് ഈ ചിത്രത്തിലെ മറ്റൊരു പ്രധാന കഥാപാത്രത്തിന് ജീവൻ പകരുന്നത്. ഈ വർഷം ഡിസംബർ അല്ലെങ്കിൽ അടുത്ത വർഷം മാർച്ചിൽ ഒന്നിലധികം ഭാഷകളിൽ ബറോസ് ലോകം മുഴുവൻ റിലീസ് ചെയ്യാനാണ് അണിയറ പ്രവർത്തകർ പ്ലാൻ ചെയ്യുന്നത്.