വിഷ്ണുപ്രിയയെ പരിചയപ്പെടുത്തി പ്രിയ വാര്യർ; ഇതിലും മികച്ച ഒരു തുടക്കം തനിക്കു ലഭിക്കാനില്ല..!

ഒമർ ലുലു സംവിധാനം ചെയ്ത ഒരു അഡാർ ലൗ എന്ന ഒറ്റ ചിത്രത്തിലൂടെ തന്നെ ഇന്ത്യ മുഴുവൻ പോപ്പുലറായ നടിയാണ് പ്രിയ പ്രകാശ് വാര്യർ. ആ ചിത്രത്തിലെ മാണിക്യ മലരായ എന്ന ഗാനത്തിന്റെ ടീസറിലെ കണ്ണിറുക്കൽ മാത്രം ഈ നടിക്ക് നേടിക്കൊടുത്തത് ലോകം മുഴുവനുമുള്ള സോഷ്യൽ മീഡിയ ശ്രദ്ധയാണ്. ആ ചിത്രത്തിന് ശേഷം ശ്രീദേവി ബംഗ്ലാവ് എന്നൊരു ബോളിവുഡ് ചിത്രത്തിലും പ്രിയ പ്രകാശ് വാര്യർ പ്രത്യക്ഷപ്പെട്ടു. തനഹ എന്നൊരു മലയാള ചിത്രത്തിലും ഇതു കൂടാതെ പ്രിയ പ്രകാശ് വാര്യർ അഭിനയിച്ചിട്ടുണ്ട്. ഇപ്പോഴിതാ ഈ നടി കന്നഡ സിനിമയിൽ അരങ്ങേറ്റം കുറിക്കാനൊരുങ്ങുകയാണ്.വിഷ്ണുപ്രിയ എന്നു പേരിട്ടിരിക്കുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇപ്പോൾ പ്രിയ പ്രകാശ് വാര്യർ തന്നെ റിലീസ് ചെയ്തിരിക്കുകയാണ്.പോസ്റ്റർ പങ്കു വെച്ചു കൊണ്ട് പ്രിയ വാര്യർ പറയുന്ന വാക്കുകൾ ഇതാണ്.

“അപ്പോൾ ഇതാണ് കന്നഡയിലെ എന്റെ അരങ്ങേറ്റ ചിത്രം വിഷ്ണുപ്രിയയുടെ പോസ്റ്റർ. ഇത്തരമൊരു അതിശയകരമായ ടീമിനൊപ്പം ഈ യാത്രയുടെ ഭാഗമാകാൻ കഴിഞ്ഞതിൽ ഞാൻ ആഹ്ലാദത്തിലാണ്. ഇതിലും മികച്ചൊരു തുടക്കം എനിക്ക് ലഭിക്കാനില്ല”. പ്രശസ്ത മലയാള സംവിധായകൻ വി കെ പ്രകാശ് സംവിധാനം ചെയ്തിരിക്കുന്ന ഈ ചിത്രത്തിൽ നായകനായി എത്തുന്നത് ശ്രേയസ് മഞ്ജു എന്ന നടനാണ്. ഒരു റൊമാന്റിക് ചിത്രമാണ് ഇതെന്ന സൂചനയാണ് ഇപ്പോൾ ലഭിക്കുന്നത്. മലയാളത്തിലെ സൂപ്പർ ഹിറ്റ് സംഗീത സംവിധായകനായ ഗോപി സുന്ദറാണ് ഈ ചിത്രത്തിന് വേണ്ടി ഗാനങ്ങളൊരുക്കിയിരിക്കുന്നത്. സിനിമകൾ കൂടാതെ പരസ്യ ചിത്രങ്ങളിലും പ്രിയ വാര്യർ പ്രത്യക്ഷപ്പെടുന്നുണ്ട്.