വേദാന്തം IPS ആയി അർബാസ് ഖാൻ; 25 കോടി മുതൽ മുടക്കിൽ മോഹൻലാലിൻറെ ബിഗ് ബ്രദർ

കംപ്ലീറ്റ് ആക്ടർ മോഹൻലാൽ നായകനായി എത്തുന്ന പുതിയ ചിത്രമാണ് ബിഗ് ബ്രദർ. പ്രശസ്ത സംവിധായകൻ സിദ്ദിഖ് രചനയും സംവിധാനവും നിർവഹിച്ച ഈ ചിത്രം 25 കോടി രൂപ മുതൽ മുടക്കിലാണ് എത്തുന്നത്. അടുത്ത മാസം പകുതിയോടെ വേൾഡ് വൈഡ് റിലീസ് ആയി എത്തുന്ന ഈ ചിത്രത്തിലെ ആദ്യ കാരക്ടർ പോസ്റ്റർ ഇന്ന് റിലീസ് ചെയ്തു. ബോളിവുഡ് താരം അർബാസ് ഖാനാണ് ആദ്യ കാരക്ടർ പോസ്റ്ററിൽ ഉള്ളത്. വേദാന്തം ഐ പി എസ് എന്ന കഥാപാത്രം ആയാണ് അർബാസ് ഖാൻ ഈ ചിത്രത്തിൽ പ്രത്യക്ഷപ്പെടുന്നത്. പോസ്റ്ററിൽ മോഹൻലാലിന്റെ സാന്നിധ്യവും ഉണ്ട്. സച്ചിദാനന്ദൻ എന്ന പേരിൽ ആണ് മോഹൻലാൽ ഈ ചിത്രത്തിൽ പ്രത്യക്ഷപ്പെടുന്നത് എന്നാണ് സൂചന.

സിദ്ദിഖിന്റെ കരിയറിലെ ഏറ്റവും മുതൽ മുടക്കുള്ള ചിത്രമായ ബിഗ് ബ്രദർ റിലീസിന് മുൻപേ തന്നെ റെക്കോർഡുകൾ സ്ഥാപിച്ചു കഴിഞ്ഞു. ഒരു മലയാള സിനിമയ്ക്കു കിട്ടുന്ന ഏറ്റവും വലിയ നോൺ – ജി സി സി ഡിസ്ട്രിബൂഷൻ റൈറ്റ്സ് ആണ് ഈ മോഹൻലാൽ ചിത്രം നേടിയെടുത്തത്. ഇതിന്റെ സാറ്റലൈറ്റ് റൈറ്റ്സ് റെക്കോർഡ് തുകക്ക് സൂര്യ ടിവിയും ഡിജിറ്റൽ റൈറ്റ്സ് വമ്പൻ തുകക്ക് ആമസോൺ പ്രൈമും സ്വന്തമാക്കി കഴിഞ്ഞു. വമ്പൻ ബാനർ ആയ കാർണിവൽ ഗ്രൂപ് ആണ് ഈ ചിത്രം ഗൾഫിൽ ഡിസ്ട്രിബൂഷൻ നടത്തുന്നത്. എസ് ടാക്കീസ് , ഫിലിപ്പോസ് കെ ജോസഫ് , മനു മാളിയേക്കൽ , ജെൻസൊ ജോസ് , വൈശാഖ് രാജൻ, സിദ്ധിഖ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന്റെ സംഗീതം ഒരുക്കിയത് ദീപക് ദേവും കാമറ ചലിപ്പിച്ചത് ജിത്തു ദാമോദറും ആണ്.