അനിക്കുട്ടനെ ഏറ്റെടുത്ത് പ്രേക്ഷകർ; ഫഹദിന്റെ പ്രകടന മികവിൽ സൂപ്പർ വിജയത്തിലേക്ക് മലയൻ കുഞ്ഞ്

ഇന്നലെയാണ് ഫഹദ് ഫാസിൽ നായകനായ ഏറ്റവും പുതിയ ചിത്രമായ മലയൻ കുഞ്ഞ് തീയേറ്ററുകളിലെത്തിയത്. നവാഗത സംവിധായകനായ സജിമോൻ സംവിധാനം ചെയ്ത ഈ ചിത്രത്തിന് തിരക്കഥ രചിച്ചത് സൂപ്പർ ഹിറ്റ് ചിത്രങ്ങളുടെ സംവിധായകനും എഡിറ്ററുമായ മഹേഷ് നാരായണനും, ഇത് നിർമ്മിച്ചത് പ്രശസ്ത സംവിധായകനും ഫഹദിന്റെ അച്ഛനുമായ ഫാസിലുമാണ്. ഒരു സർവൈവൽ ത്രില്ലറായി ഒരുക്കിയ ഈ ചിത്രത്തിന് ഗംഭീര പ്രേക്ഷക പ്രതികരണമാണ് ലഭിക്കുന്നത്. ഫഹദ് ഫാസിലിന്റെ മറ്റൊരു മികച്ച പ്രകടനത്തിന് കൂടിയാണ് ഈ ചിത്രം കളമൊരുക്കിയത്. അനികുട്ടൻ എന്ന ഇലക്ട്രോണിക് ടെക്‌നീഷ്യനായി ഫഹദ് കാഴ്ച വെച്ച പ്രകടനത്തിന് വലിയ കയ്യടിയാണ് സോഷ്യൽ മീഡിയയിൽ നിന്നും ലഭിക്കുന്നത്. ആദ്യ പകുതിയിൽ ഒരു ഡ്രാമ പോലെ മുന്നോട്ടു നീങ്ങുന്ന ഈ ചിത്രം ഒന്നാം പകുതിയുടെ അവസാനത്തോടെയാണ് സർവൈവൽ ത്രില്ലറായി മാറുന്നത്.

രണ്ടാം പകുതിയിൽ, ഉരുൾപൊട്ടലിൽ ഭൂമിക്കടിയിൽ പെട്ട് പോകുന്ന അനികുട്ടന്റെ അവസ്ഥ ഫഹദ് അഭിനയിച്ചു ഫലിപ്പിച്ചതും, അതുപോലെ ആ രംഗങ്ങൾ പ്രേക്ഷകരുടെ മുന്നിൽ സംവിധായകനും രചയിതാവും ചേർന്നവതരിപ്പിച്ചിരിക്കുന്നതും മനോഹരമായാണ്. പ്രകൃതി ദുരന്തത്തിന്റെ എല്ലാ ഭീകരതയും ഭയവും അതിജീവനത്തിന്റെ ആകാംഷയും പ്രതീക്ഷയുമെല്ലാം ഈ ചിത്രത്തിലൂടെ പ്രേക്ഷകരുടെ മുന്നിലെത്തിക്കാൻ അവർക്കു സാധിച്ചിട്ടുണ്ട്. രജിഷ വിജയൻ, ജാഫർ ഇടുക്കി, ഇന്ദ്രന്‍സ്, ജയ കുറുപ്പ്, ദീപക് പറമ്പോല്‍, അര്‍ജുന്‍ അശോകന്‍, ജോണി ആന്റണി, ഇര്‍ഷാദ് എന്നിവരും അഭിനയിച്ച ഈ ചിത്രത്തിന്റെ മറ്റൊരു ഹൈലൈറ്റ് എ ആർ റഹ്മാന്റെ സംഗീതമാണ്. ഏതായാലും ഇപ്പോൾ ഫഹദിന്റെ പ്രകടന മികവിലേറി സൂപ്പർ വിജയത്തിലേക്കാണ് മലയൻ കുഞ്ഞിന്റെ യാത്ര എന്ന് പറയാം.