മാലിക്കിന് വേണ്ടി 15 കിലോ കുറച്ചു ഫഹദ് ഫാസിൽ; 27 കോടി ബഡ്ജറ്റിൽ ഒരുങ്ങുന്നത് വമ്പൻ ചിത്രം

യുവ താരം ഫഹദ് ഫാസിൽ തന്റെ കരിയറിലെ ഏറ്റവും വലിയ ചിത്രവുമായി എത്താൻ ഒരുങ്ങുകയാണ്. ടേക്ക് ഓഫ് എന്ന സൂപ്പർ ഹിറ്റ് ചിത്രത്തിന് ശേഷം മഹേഷ് നാരായണൻ ഒരുക്കുന്ന ചിത്രമാണ് മാലിക്ക്. 27 കോടി രൂപയോളം ചെലവ് വരുന്ന ഈ ചിത്രം മലയാളത്തിന്റെ യുവ താരനിരയിൽ നിന്ന് എത്തുന്ന ഏറ്റവും വലിയ ചിത്രങ്ങളിൽ ഒന്നാണ്. ഫഹദ് ഫാസിലിനെയും നിമിഷ സജയനെയും കേന്ദ്രകഥാപാത്രങ്ങളാക്കി മഹേഷ് നാരായണന്‍ ഒരുക്കുന്ന ഈ ചിത്രത്തിന് വേണ്ടി വമ്പൻ മേക് ഓവർ ആണ് ഫഹദ് നടത്തിയിരിക്കുന്നത്. ഈ ചിത്രത്തിന് വേണ്ടി പതിനഞ്ചു കിലോയോളം ശരീര ഭാരം കുറച്ച ഫഹദിന്റെ ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറൽ ആണ്.

ആന്റോ ജോസഫ് നിർമ്മിക്കുന്ന ഈ ചിത്രത്തിൽ ചിത്രത്തില്‍ വലിയ താരനിര തന്നെയാണ് അണിനിരക്കുന്നത്. ബിജു മേനോന്‍, വിനയ് ഫോര്‍ട്ട്, ദിലീഷ് പോത്തന്‍, അപ്പാനി ശരത്ത്, ഇന്ദ്രന്‍സ്, നായിക ജലജ എന്നിവരും അഭിനയിക്കുന്ന ഈ ചിത്രം അടുത്ത വർഷം ഏപ്രിൽ മാസത്തിൽ റിലീസ് ചെയ്യാൻ ആണ് പ്ലാൻ എന്നറിയുന്നു. ഏതായാലും ഫഹദിന്റെ ഈ ചിത്രത്തിലെ ലുക്ക് വൈറൽ ആയതോടെ ചിത്രത്തിൽ ഉള്ള പ്രേക്ഷക പ്രതീക്ഷയും കൂടി കഴിഞ്ഞു. ടേക്ക് ഓഫിന് ദേശീയ അവാര്‍ഡ് വാങ്ങിയ സന്തോഷ് രാമന്‍ കലാസംവിധാനവും, സാനു ജോണ്‍ വര്‍ഗീസ് ക്യാമറയും സുഷിന്‍ ശ്യം സംഗീതവും നിർവഹിക്കുന്ന ഈ ചിത്രത്തിന് വേണ്ടി സംഘട്ടനം ഒരുക്കുന്നത് ഹോളിവുഡ് സംഘട്ടന സംവിധായകൻ ആയ ലീ വിറ്റാക്കർ ആണ്. മഹേഷ് നാരായണൻ ആദ്യമായി ഒരുക്കിയ ടേക്ക് ഓഫിൽ ഫഹദ് ഫാസിൽ, പാർവതി, കുഞ്ചാക്കോ ബോബൻ, ആസിഫ് അലി എന്നിവർ ആണ് അഭിനയിച്ചത്.