വീണ്ടും തമിഴിലെ ബിഗ് ബഡ്ജറ്റ് ചിത്രത്തിൽ വില്ലൻ ആവാൻ ഫഹദ് ഫാസിൽ..!

മലയാളത്തിലെ യുവ താരമായ ഫഹദ് ഫാസിൽ തന്റെ അഭിനയ മികവ് കൊണ്ട് ഇപ്പോൾ ഇന്ത്യ മുഴുവൻ ശ്രദ്ധ നേടിക്കഴിഞ്ഞു. മലയാളത്തിന് പുറമെ തമിഴ്, തെലുങ്കു ഭാഷകളിലും ഫഹദ് തന്റെ സാന്നിധ്യം ഉറപ്പിച്ചു കഴിഞ്ഞു. തമിഴിൽ വേലയ്ക്കാരൻ എന്ന മോഹൻ രാജ ചിത്രത്തിൽ ശിവകാർത്തികേയന്റെ വില്ലൻ ആയി അഭിനയിച്ച ഫഹദ് പിന്നീട് സൂപ്പർ ഡീലക്സ് എന്ന ചിത്രത്തിലും അഭിനയിച്ചു. അതിനു ശേഷം ഇപ്പോൾ ലോകേഷ് കനകരാജ് ഒരുക്കുന്ന വിക്രം എന്ന കമൽ ഹാസൻ ചിത്രത്തിലും ഫഹദ് അഭിനയിക്കുകയാണ്. ഇത് കൂടാതെ തെലുങ്കിൽ അല്ലു അർജുന്റെ വില്ലൻ ആയി പുഷ്പ എന്ന ചിത്രത്തിലും ഈ അടുത്തിടെ ഫഹദ് പ്രത്യക്ഷപെട്ടു. ആ ചിത്രത്തിന്റെ ആദ്യ ഭാഗം ആണ് ഇപ്പോൾ റിലീസ് ചെയ്തത്. അതിന്റെ രണ്ടാം ഭാഗത്തിലും പ്രധാന വില്ലൻ ആയി ഫഹദ് ഉണ്ടാകും എന്നാണ് സൂചന. ഇപ്പോഴിതാ മറ്റൊരു തമിഴ് ചിത്രത്തിൽ കൂടി വില്ലൻ ആയി അഭിനയിക്കാൻ ഒരുങ്ങുകയാണ് ഫഹദ് എന്ന വാർത്തകളാണ് വരുന്നത്.

പരിയേറും പെരുമാൾ, കർണൻ എന്നീ സൂപ്പർ ഹിറ്റ് ചിത്രങ്ങൾക്കു ശേഷം മാരി സെൽവരാജ് സംവിധാനം ചെയ്യുന്ന ചിത്രത്തിൽ ആണ് ഫഹദ് ഫാസിൽ വില്ലൻ ആയി എത്തുക. ഉദയനിധി സ്റ്റാലിൻ നായക വേഷം ചെയ്യുന്ന ഈ ചിത്രത്തിൽ കീർത്തി സുരേഷ് ആണ് നായികാ വേഷം ചെയ്യുന്നത്. വടിവേലുവും ചിത്രത്തിൽ അഭിനയിക്കുന്നുണ്ട് എന്നും വാർത്തകൾ വരുന്നുണ്ട്. സംഗീത മാന്ത്രികൻ എ ആർ റഹ്മാൻ ഗാനങ്ങൾ ഒരുക്കുന്ന ഈ സിനിമയുടെ ചിത്രീകരണം വരുന്ന ഫെബ്രുവരിയിൽ തുടങ്ങും എന്നാണ് വാർത്തകൾ പറയുന്നത്. ഫാസിൽ നിർമ്മിച്ച് നവാഗതനായ സജിമോൻ ഒരുക്കിയ മലയൻ കുഞ്ഞ് എന്ന ചിത്രമാണ് മലയാളത്തിലെ ഫഹദിന്റെ അടുത്ത റിലീസ്.