രോമാഞ്ചം സംവിധായകനൊപ്പം ഒന്നിക്കാൻ ഫഹദ് ഫാസിൽ ?; രോമാഞ്ചം 2 ആണോയെന്ന ആകാംഷയിൽ പ്രേക്ഷകർ

ഇപ്പോൾ കേരളത്തിൽ ബ്ലോക്ക്ബസ്റ്റർ വിജയം നേടി തീയേറ്ററുകളെ ജനസാഗരമാക്കുന്ന ചിത്രമാണ് രോമാഞ്ചം. സൗബിൻ ഷാഹിർ, അർജുൻ അശോകൻ എന്നിവരും ഒട്ടേറെ പുതുമുഖ താരങ്ങളും വേഷമിട്ട ഈ ചിത്രം സംവിധാനം ചെയ്തത് നവാഗതനായ ജിത്തു മാധവനാണ്. ആദ്യാവസാനം പ്രേക്ഷകനെ പൊട്ടിച്ചിരിപ്പിക്കുന്ന ഈ ഹൊറർ കോമഡി ചിത്രത്തിന് കേരളത്തിലും വിദേശത്തും വമ്പൻ പ്രതികരണമാണ് ലഭിക്കുന്നത്. ഈ ചിത്രത്തിന് ഒരു രണ്ടാം ഭാഗം ഉണ്ടാകുമെന്നും ചിത്രത്തിന്റെ അവസാനം അണിയറ പ്രവർത്തകർ സൂചിപ്പിച്ചിട്ടുണ്ട്. ഇപ്പോഴിതാ ജിത്തു മാധവൻ ഒരുക്കാൻ പോകുന്ന പുതിയ ചിത്രത്തിൽ ഫഹദ് ഫാസിലാണ് നായകനായി എത്തുന്നതെന്ന വാർത്തകളാണ് വരുന്നത്. അൻവർ റഷീദാണ് ഈ ചിത്രം നിർമ്മിക്കാൻ പോകുന്നതെന്നും ആ വാർത്തകളിൽ പറയുന്നു. എന്നാൽ ആ ചിത്രം രോമാഞ്ചം 2 ആണോ എന്നറിയാനുള്ള ആകാംഷയിലാണ് പ്രേക്ഷകർ. അൻവർ റഷീദ് നിർമ്മിക്കാൻ പോകുന്ന പുതിയ ചിത്രത്തിന്റെ കാസ്റ്റിംഗ് കാൾ പുറത്തു വന്നതോടെയാണ് സോഷ്യൽ മീഡിയയിൽ പ്രേക്ഷകർ ഈ ചർച്ച ആരംഭിച്ചത്.

രോമാഞ്ചത്തിന്റെ കഥ പൂർണ്ണമായി നടക്കുന്നത് ബാംഗ്ലൂർ നഗരത്തിലാണ്. ഇപ്പോൾ അൻവർ റഷീദ് നിർമ്മിക്കാൻ പോകുന്ന പുതിയ ചിത്രത്തിൻറ്‍റെ കാസ്റ്റിംഗ് കോളിലും ബാംഗ്ലൂർ നിവാസികളായ മലയാളി അഭിനേതാക്കളെയാണ് അവർ തേടുന്നത്. 18 നും 22 നും ഇടയിൽ പ്രായമുള്ള യുവാക്കൾ, 50 നും 70 നും ഇടയിൽ പ്രായമുള്ള മധ്യവയസ്കരായ ആണുങ്ങൾ, 18 നും 22 നും ഇടയിൽ പ്രായമുള്ള യുവതികൾ എന്നിവരെയാണ് അണിയറ പ്രവർത്തകർ തേടുന്നത്. താല്പര്യമുള്ളവർ തങ്ങളുടെ എഡിറ്റ് ചെയ്യാത്ത ഫോട്ടോയും പെർഫോമൻസ് വീഡിയോയും അവർ തന്നിട്ടുള്ള ഫോൺ നമ്പറിലേക്ക് അയക്കാനാണ് പറഞ്ഞിരിക്കുന്നത്. ഫെബ്രുവരി പതിനഞ്ചാണ് അവസാന തീയതി. അൻവർ റഷീദ് എന്റർടൈൻമെന്റ് നിർമ്മിക്കാൻ പോകുന്ന അഞ്ചാമത്തെ ചിത്രമായിരിക്കും ഇത്. ഏതായാലും ഈ ചിത്രം സംവിധാനം ചെയ്യാൻ പോകുന്നത് ജിത്തു മാധവൻ ആണോയെന്നും ഇതിലെ നായകൻ ഫഹദ് ഫാസിൽ ആയിരിക്കുമോയെന്നുമുള്ള വിവരങ്ങൾ ഒഫീഷ്യലായി വൈകാതെ പുറത്തു വരുമെന്നാണ് സൂചന.