ഫഹദ് ഫാസിൽ വരുന്നു കൈ നിറയെ ചിത്രങ്ങളുമായി..

ഈ വർഷം ഫഹദ് ഫാസിലിന്റേതായി ഇതിനോടകം തന്നെ രണ്ടു സൂപ്പർ ഹിറ്റ് ചിത്രങ്ങൾ നമ്മൾ കണ്ടു കഴിഞ്ഞു. മഹേഷ് നാരായണൻ സംവിധാനം ചെയ്ത ടേക്ക് ഓഫും ദിലീഷ് പോത്തൻ സംവിധാനം ചെയ്ത തൊണ്ടിമുതലും ദൃക്‌സാക്ഷിയും ആണ് ആ ചിത്രങ്ങൾ. റാഫി സംവിധാനം ചെയ്ത റോൾ മോഡൽസ് എന്ന ചിത്രവും ഫഹദ് നായകനായി പുറത്തിറങ്ങി ഈ വർഷം. ഇപ്പോൾ കൈ നിറയെ ചിത്രങ്ങളുമായി തിരക്കിലാണ് ഫഹദ്. അൻവർ റഷീദ് സംവിധാനം ചെയ്യുന്ന ട്രാൻസ് എന്ന ചിത്രം ഷൂട്ടിംഗ് ആരംഭിച്ചു കഴിഞ്ഞു. അടുത്ത വർഷമാണ് ട്രാൻസ് പ്രദർശനത്തിന് എത്തുക.

ഈ വർഷം ഷൂട്ടിങ് ആരംഭിക്കുന്ന മറ്റൊരു ഫഹദ് ചിത്രമാണ് മുന്നറിയിപ്പിന് ശേഷം വേണു സംവിധാനം ചെയ്യുന്ന കാർബൺ.
മമത മോഹൻദാസ് നായികയായെത്തുന്ന ഈ ചിത്രം കാടിന്റെ പശ്ചാത്തലത്തിൽ ഒരുങ്ങുന്ന ഒരു ത്രില്ലർ ആണ്. ബോളിവുഡ് സംവിധായകനും രചയിതാവും സംഗീത സംവിധായകനുമായ വിശാൽ ഭരദ്വാജ് ആണ് ഈ ചിത്രത്തിന്റെ സംഗീത സംവിധായകൻ. ബോളിവുഡ് ക്യാമറാമാൻ ആയ മലയാളി കെ യു മോഹനനാണ് ഈ ചിത്രത്തിന് വേണ്ടി കാമറ ചലിപ്പിക്കുന്നത് എന്നതും കാർബൺ എന്ന ഫഹദ് ഫാസിൽ ചിത്രത്തിന്റെ പ്രത്യേകതയാണ്.

ഫഹദ് ഫാസിലിന്റെ അടുത്ത റിലീസ് തമിഴ് ചിത്രമായ വേലയ്ക്കാരൻ ആണ്. മോഹൻ രാജ സംവിധാനം ചെയ്ത ഈ ചിത്രം സെപ്റ്റംബർ അവസാന വാരം പ്രദർശനത്തിനെത്തും. ഈ ചിത്രത്തിൽ ഫഹദ് വില്ലനായാണ് അഭിനയിക്കുന്നത്. ഇത് കൂടാതെ മറ്റൊരു തമിഴ് ചിത്രത്തിലും ഫഹദ് അഭിനയിക്കുന്നുണ്ട് ഈ വർഷം എന്നാണ് വാർത്തകൾ. ത്യാഗരാജൻ കുമരസാമിയാണ് ഈ ചിത്രം സംവിധാനം ചെയ്യുന്നത്.