വീണ്ടും ഒരുങ്ങുന്നത് ഒരു ഫഹദ് ഫാസിൽ ഷോ; പുഷ്പ 2 രഹസ്യം പുറത്ത് വിട്ട് നസ്രിയ

അല്ലു അർജുൻ നായകനായ പുഷ്പ 2 ട്രൈലെർ രണ്ടു ദിവസം മുൻപാണ് പ്രേക്ഷകർക്ക് മുന്നിലെത്തിയത്. ആദ്യ ഭാഗത്തേക്കാള്‍ വലിയ ക്യാന്‍വാസില്‍ ഒരുങ്ങുന്ന’പുഷ്പ 2 ദി റൂളി’ല്‍ അല്ലു അർജുനൊപ്പം നിർണായക വേഷത്തിൽ ഫഹദ് ഫാസിലും ഉണ്ട്. വലിയ ബഡ്ജറ്റിൽ ഒരു പക്കാ ആക്ഷൻ എൻ്റർടൈയ്നർ ഒരുക്കിയ ചിത്രത്തിൽ ആദ്യ ഭാഗത്തേതിനേക്കാൾ വലിയ ഒരു ഫഹദ് ഫാസിൽ ഷോ തന്നെ കാണാൻ സാധിക്കുമെന്നാണ് ട്രൈലെർ സൂചിപ്പിക്കുന്നത്.

ഇപ്പോഴിതാ ആ വാർത്ത ശരിവെക്കുകയാണ് നടിയും ഫഹദിന്റെ ഭാര്യയുമായ നസ്രിയ. തന്റെ ഏറ്റവും പുതിയ റിലീസ് ആയ സൂക്ഷ്മദർശിനിയുടെ പ്രമോഷൻ പരിപാടികളിൽ പങ്കെടുക്കവെയാണ് പുഷ്പ 2 ലെ ഫഹദിനെ കുറിച്ച് നസ്രിയ സംസാരിച്ചത്. പുഷ്പ ആദ്യഭാഗത്തേക്കാൾ പുഷ്പ 2 ലാണ് ഫഹദ് ഫാസിൽകൂടുതൽ ഉള്ളതെന്ന് നസ്രിയ പറയുന്നു. പുഷ്പ 1 ഫഹദ് കഥാപാത്രത്തിന്റെ ഒരു ഇൻട്രോ മാത്രമാണ് നമ്മുക്ക് തന്നതെങ്കിൽ, പുഷ്പ 2 ലാണ് യഥാർത്ഥ ഫഹദ് ഫാസിൽ ഷോ കാണാൻ സാധിക്കുക എന്നാണ് നസ്രിയ പറയുന്നത്.

ഭൻവർ സിംഗ് ഷെഖാവത് എന്ന വില്ലൻ കഥാപാത്രമായാണ് ഫഹദ് ഈ ചിത്രത്തിൽ വേഷമിട്ടിരിക്കുന്നത്. അല്ലു അർജുനും ഫഹദ് ഫാസിലും കൂടാതെ രശ്മിക മന്ദാന, അനസൂയ ഭരദ്വാജ് തുടങ്ങിയവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മൈത്രി മൂവി മേക്കേഴ്സാണ് പുഷ്പ 2 നിർമിക്കുന്നത്. ഡിസംബർ അഞ്ചിന് ചിത്രം ആഗോള റിലീസായി എത്തും.