കേരളത്തിലെ എക്കാലത്തെയും വലിയ റിലീസ് : എന്തിരൻ 2 തിയേറ്റർ ലിസ്റ്റ് ഇതാ

ഇന്ത്യൻ സിനിമയിലെ എക്കാലത്തെയും വലിയ ചിത്രമായ എന്തിരൻ 2 നാളെ ലോകം മുഴുവൻ പതിനായിരത്തോളം സ്‌ക്രീനുകളിൽ റിലീസ് ചെയ്യുകയാണ്. കേരളത്തിൽ ഈ ചിത്രം വിതരണം ചെയ്യുന്നത് മുളകുപാടം ഫിലിമ്സിന്റെ ബാനറിൽ ടോമിച്ചൻ മുളകുപാടം ആണ്. ഏകദേശം പതിനഞ്ചു കോടി രൂപയോളം രൂപ മുടക്കിയാണ് അദ്ദേഹം ഈ ചിത്രം ഇവിടെ വിതരണം ചെയ്യാനുള്ള അവകാശം സ്വന്തമാക്കിയത്. ഇപ്പോഴിതാ ഈ ചിത്രത്തിന്റെ തിയേറ്റർ ലിസ്റ്റ് എത്തിക്കഴിഞ്ഞു. കേരളക്കരയിലെ എക്കാലത്തെയും വലിയ റിലീസ് ആയാണ് ഈ ബ്രഹ്മാണ്ഡ ചിത്രം എത്തിയിരിക്കുന്നത്. ഏകദേശം 450 നു മുകളിൽ സ്‌ക്രീനുകളിൽ ആണ് എന്തിരൻ 2 കേരളത്തിൽ റിലീസ് ചെയ്യുന്നത്. വെളുപ്പിന് നാല് മണി മുതൽ ഈ ചിത്രത്തിന്റെ ഷോകൾ ആരംഭിക്കും.

മികച്ച അഡ്വാൻസ് ബുക്കിംഗ് ലഭിച്ച ഈ ചിത്രം കേരളത്തിൽ ഓപ്പണിങ് ഡേ റെക്കോർഡ് നേടും എന്നാണ് പ്രതീക്ഷിക്കപ്പെടുന്നത്. ശങ്കർ സംവിധാനം ചെയ്ത ഈ ചിത്രം രചിച്ചത് ശങ്കറും ജയമോഹനും ചേർന്നാണ്. സൂപ്പർ സ്റ്റാർ രജനികാന്തും ബോളിവുഡ് സൂപ്പർ സ്റ്റാർ അക്ഷയ് കുമാറും അഭിനയിക്കുന്ന ഈ ചിത്രത്തിൽ നായിക ആമി ജാക്സൺ ആണ്. ഏകദേശം 550 കോടി രൂപയ്ക്കു മുകളിൽ പണം ചെലവഴിച്ചു ലൈക്ക പ്രൊഡക്ഷൻസ് ആണ് ഈ ബിഗ് ബജറ്റ് ചിത്രം നിർമ്മിച്ചിരിക്കുന്നത്. തമിഴ്, തെലുങ്ക്, ഹിന്ദി ഭാഷകളിൽ ആയി റിലീസ് ചെയ്യാൻ പോകുന്ന ഈ ചിത്രത്തിൽ അക്ഷയ് കുമാർ വില്ലൻ വേഷത്തിൽ ആണ് എത്തുന്നത്. ഹോളിവുഡ് സാങ്കേതിക വിദഗ്‌ധർ അണിയറയിൽ പ്രവർത്തിച്ച ഈ ചിത്രത്തിന് സംഗീതം നൽകിയിരിക്കുന്നത് എ ആർ റഹ്മാനും ഛായാഗ്രഹണം നിർവഹിച്ചിരിക്കുന്നത് നീരവ് ഷായും ആണ്. പൂർണ്ണമായും ഐ മാക്സ് ത്രീഡി ടെക്‌നോളജി ഉപയോഗിച്ചാണ് ഈ ചിത്രം ഷൂട്ട് ചെയ്തിരിക്കുന്നത്.