എമ്പുരാൻ ഒരുക്കുന്നത് ഒരു മലയാള ചിത്രമായി മാത്രമല്ല; കൂടുതൽ വെളിപ്പെടുത്തി മോഹൻലാൽ

ഇന്ന് മലയാള സിനിമാ പ്രേമികളും മോഹൻലാൽ ആരാധകരും ഏറ്റവും കൂടുതൽ കാത്തിരിക്കുന്ന ചിത്രമാണ് അദ്ദേഹത്തെ നായകനാക്കി പൃഥ്വിരാജ് സുകുമാരൻ സംവിധാനം ചെയ്യാൻ പോകുന്ന മൂന്നാമത്തെ ചിത്രമായ എമ്പുരാൻ. അടുത്ത വർഷം ആദ്യം ഷൂട്ടിംഗ് ആരംഭിക്കാൻ പോകുന്ന ഈ ചിത്രത്തിന്റെ പ്രീ- പ്രൊഡക്ഷൻ ജോലികളാണ് ഇപ്പോൾ നടക്കുന്നത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ഈ ചിത്രം രചിക്കുന്നത് മുരളി ഗോപിയാണ്. പൃഥ്വിരാജ് സുകുമാരന്റെ ആദ്യ സംവിധാന സംരംഭമായ മോഹൻലാൽ ചിത്രം ലൂസിഫറിന്റെ രണ്ടാം ഭാഗമാണ് എമ്പുരാൻ. മൂന്നു ഭാഗങ്ങളാണ് ലൂസിഫർ സീരീസിൽ ഉള്ളതെന്നും, എമ്പുരാൻ കഴിഞ്ഞു ഒരു ഭാഗം കൂടെ ഉണ്ടാവുമെന്നും അവർ അറിയിച്ചിരുന്നു. ഇപ്പോഴിതാ ഈ ചിത്രത്തെ കുറിച്ച് കൂടുതൽ സംസാരിക്കുകയാണ് മോഹൻലാൽ.

കഴിഞ്ഞ ദിവസം ദുബായിൽ വെച്ച് ഗൾഫ് ന്യൂസിന് നൽകിയ അഭിമുഖത്തിലാണ് അദ്ദേഹം മനസ്സ് തുറന്നത്. എമ്പുരാൻ വൈകാതെ ആരംഭിക്കുമെന്നും അതിൽ താൻ ഏറെ ആവേശവാനാണെന്നും മോഹൻലാൽ പറയുന്നു. ഒരു മലയാള ചിത്രം മാത്രമായല്ല എമ്പുരാൻ ഒരുക്കുന്നതെന്നും, അത്ര വലിയ രീതിയിൽ ഒരു ഇന്ത്യൻ ചിത്രമായാണ് ഇതൊരുക്കാൻ പോകുന്നതെന്നും മോഹൻലാൽ വെളിപ്പെടുത്തി. ലൂസിഫറിന്റെ രണ്ടാം ഭാഗം എന്ന് പറയാമെങ്കിലും, ശരിയായ അർത്ഥത്തിൽ ഇതൊരു രണ്ടാം ഭാഗമല്ല എന്നും അദ്ദേഹം വിശദീകരിച്ചു. എമ്പുരാൻ, താൻ സംവിധാനം ചെയ്യുന്ന ബറോസ്, ജീത്തു ജോസഫ് ചിത്രം റാം, ദൃശ്യം 3, താൻ ഉടനെ കരാറൊപ്പിടാൻ പോകുന്ന ഋഷഭ എന്ന ബഹുഭാഷാ ചിത്രണമെന്നിവ പാൻ ഇന്ത്യൻ തലത്തിൽ മാർക്കറ്റ് ചെയ്യുന്ന നിലയിലാണ് ഒരുക്കാൻ പോകുന്നതെന്നും മോഹൻലാൽ അറിയിച്ചു.