നിർമ്മാണ രംഗത്തേക്ക് ദുൽകർ സൽമാനും; ആദ്യ ചിത്രം മേയിൽ..!

താരങ്ങൾ നിർമ്മാണ രംഗത്തേക്കും എത്തുന്നത് ഇതാദ്യം ഒന്നുമല്ല. എല്ലാ ഫിലിം ഇൻഡസ്‌ട്രികളിലും പ്രധാന താരങ്ങൾ തങ്ങളുടെ സ്വന്തം നിർമ്മാണ സംരംഭങ്ങളുമായി മുന്നോട്ടു വരാറുണ്ട്. മലയാളത്തിലും പ്രമുഖ താരങ്ങൾക്കു തങ്ങളുടെ സ്വന്തം സിനിമാ നിർമ്മാണ കമ്പനിയുണ്ട്. അതിൽ തന്നെ,  മോഹൻലാലിൻറെ ആശീർവാദ് സിനിമാസ് മലയാളത്തിലെ ഏറ്റവും വലിയ പ്രൊഡക്ഷൻ, ഡിസ്ട്രിബ്യുഷൻ കമ്പനി ആണ്. മെഗാ സ്റ്റാർ മമ്മൂട്ടിക്കും പ്ളേ ഹൌസ് എന്ന പേരിൽ സ്വന്തമായി നിർമ്മാണ കമ്പനിയുണ്ട്. ഇപ്പോഴിതാ മമ്മൂട്ടിയുടെ മകനും യുവ താരവുമായ ദുൽകർ സൽമാനും തന്റെ നിർമ്മാണ കമ്പനിയുമായി മുന്നോട്ടു വരികയാണ്. ഈ നിർമ്മാണ കമ്പനിയുടെ ബാനറിൽ ദുൽകർ നിർമ്മിക്കുന്ന ആദ്യ ചിത്രം വരുന്ന മെയ് മാസത്തിൽ തുടങ്ങും.

താൻ അഭിനയിക്കാത്ത സിനിമകളുടെയും നിർമ്മാണം എന്നതാണ് പ്ലാൻ എന്നും ഇപ്പോൾ ധാരാളം കഥകൾ കേൾക്കുന്നുണ്ട് എന്നും ദുൽകർ പറയുന്നു. എല്ലാം തനിക്കു ചെയ്യാൻ കഴിയില്ല എന്നത് കൊണ്ട് തന്നെ അതിൽ ചിലതു നിർമ്മിക്കാം എന്ന് തീരുമാനിച്ചു എന്നാണ് ദുൽകർ സൽമാൻ പറയുന്നത്. ആളുകളുമായി കണക്ട് ചെയ്യുന്ന ചെറിയ സിനിമകൾ നിർമ്മിക്കാൻ ആണ്  പരിപാടി എന്നും കഥകൾ കേട്ട് പ്രൊജെക്ടുകൾ പ്ലാൻ ചെയ്യാൻ ഒരു ടീം ഉണ്ടെന്നും ദുൽകർ പറയുന്നു. പ്രോജക്ടിന് മുൻപേ താൻ കഥ കേൾക്കും എന്നും പൂർണ്ണമായും പുതിയ ഒരു ടീമാകും ഇതിനു പിന്നിൽ എന്നും ദുൽകർ പറഞ്ഞു. പൃഥ്വിരാജ്, ഫഹദ് ഫാസിൽ, ദിലീപ്, നിവിൻ പോളി, ടോവിനോ തോമസ് എന്നിവരും സ്വന്തമായി സിനിമ നിർമ്മിച്ചിട്ടുള്ള മലയാളത്തിലെ യുവ താരങ്ങൾ ആണ്.