നസ്ലൻ – കല്യാണി പ്രിയദർശൻ ചിത്രത്തിൽ ദുൽഖർ സൽമാൻ, ടോവിനോ തോമസ്- ആസിഫ് അലി ടീം ?

നസ്ലൻ, കല്യാണി പ്രിയദർശൻ എന്നിവരെ പ്രധാന കഥാപാത്രങ്ങളാക്കി അരുൺ ഡൊമിനിക് രചിച്ചു സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് ഇപ്പോൾ പുരോഗമിക്കുകയാണ്. ദുൽഖർ സൽമാന്റെ വേഫെറർ ഫിലിംസ് നിർമ്മിക്കുന്ന ഏഴാമത്തെ ചിത്രമാണിത്. ചന്ദു സലിം കുമാർ, അരുൺ കുര്യൻ, ശാന്തി ബാലചന്ദ്രൻ എന്നിവരും വേഷമിടുന്ന ഈ ചിത്രത്തിന്റെ സെറ്റിൽ അടുത്തിടെ മെഗാസ്റ്റാർ മമ്മൂട്ടി എത്തിയത് വലിയ വാർത്ത ആയി മാറിയിരുന്നു.

ഇപ്പോഴിതാ ഈ ചിത്രത്തെ കുറിച്ചുള്ള സ്ഥിരീകരിക്കാത്ത മറ്റൊരു വാർത്ത കൂടി സോഷ്യൽ മീഡിയയിൽ പ്രചരിക്കുകയാണ്‌. ചിത്രത്തിന്റെ നിർമ്മാതാവായ ദുൽഖർ സൽമാൻ, യുവതാരങ്ങളായ ടോവിനോ തോമസ്, ആസിഫ് അലി എന്നിവർ ഈ ചിത്രത്തിൽ അതിഥി വേഷങ്ങളിൽ എത്തുമെന്നാണ് സൂചന. അഞ്ച് ഭാഗങ്ങളായി ഒരുങ്ങുന്ന ഒരു സിനിമാറ്റിക്ക് യൂണിവേഴ്‌സിൻ്റെ ആദ്യ ഭാഗമാണ് ഈ ചിത്രമെന്ന റിപ്പോർട്ട് നേരത്തെ തന്നെ വന്നിരുന്നു. അത്കൊണ്ട് തന്നെ ഈ വമ്പൻ താരങ്ങളുടെ അതിഥി വേഷം, ഈ യൂണിവേഴ്സിലെ അടുത്ത ചിത്രങ്ങളിലേക്കുള്ള ലീഡ് കൊടുക്കുന്ന തരത്തിൽ ആവുമോ എന്നറിയാനുള്ള ആകാംക്ഷയിലാണ് പ്രേക്ഷകർ.

നിമിഷ് രവി കാമറ ചലിപ്പിക്കുന്ന ഈ ചിത്രത്തിന്റെ അഡീഷണൽ തിരക്കഥ രചിച്ചത് ശാന്തി ബാലചന്ദ്രനാണ്. എഡിറ്റർ – ചമൻ ചാക്കോ. ചിത്രത്തിന്റെ പേര് ഇതുവരെ പുറത്ത് വിട്ടിട്ടില്ല. ടോവിനോ തോമസ് നായകനായ തരംഗം എന്ന ചിത്രമൊരുക്കി അരങ്ങേറ്റം കുറിച്ച സംവിധായകനാണ് അരുൺ ഡൊമിനിക്.