ദുൽകറിന് സോളോയിൽ നാല് നായികമാർ..

ദുൽകർ സൽമാൻ നായകനായെത്തുന്ന തമിഴ്- മലയാളം ദ്വിഭാഷാ ചിത്രമാണ് ബിജോയ് നമ്പ്യാർ സംവിധാനം ചെയ്ത സോളോ. ഇപ്പോൾ പോസ്റ്റ്-പ്രൊഡക്ഷൻ സ്റ്റേജിലുള്ള ഈ ചിത്രം ഈ വരുന്ന സെപ്തംബര് മാസത്തിൽ വമ്പൻ റിലീസായി കേരളത്തിലും തമിഴ് നാട്ടിലും എത്തുമെന്നാണ് ഇപ്പോൾ ലഭിക്കുന്ന വിവരം. നാല് കഥകൾ പറയുന്ന ഒരു ആന്തോളജി മൂവി ആണ് സോളോ. ദുൽകർ സൽമാൻ തന്നെയാണ് ആ നാല് കഥകളിലെയും പ്രധാന വേഷങ്ങൾ അവതരിപ്പിക്കുന്നത്. നാല് വ്യത്യസ്ത ലുക്കുകളിൽ ആണ് ദുൽകർ ഈ ചിത്രത്തിൽ പ്രത്യക്ഷപ്പെടുന്നത്. ഈ നാല് ലുക്കുകളും കൂടി ചേർന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ ഈ കഴിഞ്ഞ ജൂലൈ ഇരുപത്തിയെട്ടിന് ദുൽകർ സൽമാന്റെ ജന്മദിനം പ്രമാണിച്ചു സോളോയുടെ അണിയറ പ്രവർത്തകർ പുറത്തു വിട്ടിരുന്നു. മാത്രമല്ല അതിനോടൊപ്പം ചിത്രത്തിന്റെ ആദ്യ ടീസറും അവർ പുറത്തു വിട്ടിട്ടുണ്ട്. ടീസറിന് ഗംഭീര സ്വീകരണം ആണ് സോഷ്യൽ മീഡിയയിൽ നിന്ന് ലഭിക്കുന്നത്.

ഈ ചിത്രത്തിൽ ദുൽഖറിന് നാല് നായികമാർ ആണുള്ളത്. അന്യ ഭാഷാ നടിമാരാണ് ഈ ചിത്രത്തിലെ ദുല്കറിന്റെ നായികാ വേഷങ്ങൾ കൈകാര്യം ചെയ്യുന്നത്. സായി ധൻസിക , ശ്രുതി ഹരിഹരൻ, നേഹ ശർമ്മ, ആർത്തി വെങ്കിടേഷ് എന്നിവരാണ് ആ നാല് നായികമാർ.

ഈ ചിത്രത്തിന്റെ ഷൂട്ടിംഗ് സ്റ്റില്ലുകൾ ഇപ്പോൾ തന്നെ സോഷ്യൽ മീഡിയയിൽ തരംഗമാണ്. പ്രണയത്തിനൊപ്പം സസ്പെന്സിനും പ്രാധാന്യം നൽകുന്ന ഈ ചിത്രം ഒരു മാസ്സ് എന്റെർറ്റൈനെർ എന്ന നിലയിൽ തന്നെയാണ് ബിജോയ് നമ്പ്യാർ അണിയിച്ചൊരുക്കിയിരിക്കുന്നത് എന്നാണ് ലഭിക്കുന്ന സൂചനകൾ.

സുഹാസിനി, നാസ്സർ, മനോജ് കെ ജയൻ, ഡിനോ മൊറീയ, സൗബിൻ ഷാഹിർ , ആൻസൺ പോൾ , പാർത്ഥിപൻ, ജോൺ വിജയ്, സായി തമൻഹാങ്കർ ,പ്രകാശ് ബെലവാദി , ആൻ അഗസ്റ്റിൻ, ദീപ്തി സതി എന്നിവരും ഈ ചിത്രത്തിന്റെ താരനിരയുടെ ഭാഗമാണെന്നറിയുന്നു.

ബിജോയ് നമ്പ്യാർ തന്നെ രചന നിർവഹിച്ചിരിക്കുന്ന ഈ ചിത്രം ബിജോയ് നമ്പ്യാരും എബ്രഹാം മാത്യുവും ചേർന്ന് നിർമ്മിച്ചിരിക്കുന്നു.. ചിലപ്പോൾ ഈ ചിത്രത്തിന്റെ ഹിന്ദി മൊഴിമാറ്റ വേർഷനും പ്രദര്ശനത്തിനെത്തുമെന്നാണ് ലഭിക്കുന്ന വിവരം .