ജലക്ഷാമം രൂക്ഷം; തമിഴ് സിനിമയിൽ മഴ രംഗങ്ങൾക്ക് നിയന്ത്രണം..!

കടുത്ത ജലക്ഷാമം മൂലം വിഷമിക്കുകയാണ് തമിഴ്നാട്. ചെന്നൈയിൽ ആണെങ്കിൽ ജലക്ഷാമം മൂലം ദൈനംദിന കാര്യങ്ങൾക്ക് പോലും ജനങ്ങൾ ബുദ്ധിമുട്ടുകയാണ്. വിദ്യാലയങ്ങൾ അടച്ചിട്ടും ഐ ടി കമ്പനികളിൽ ജോലി ചെയ്യുന്നവരോട് വീട്ടിൽ തന്നെ ഇരുന്നു ജോലി ചെയ്യാനും ഒക്കെ പറഞ്ഞു കൊണ്ട് ജലക്ഷാമം ഉണ്ടാക്കുന്ന രൂക്ഷതയെ നേരിടാൻ ശ്രമിക്കുകയാണ് ചെന്നൈ. ഇപ്പോഴിതാ അതിന്റെ ഭാഗം ആയി തമിഴ് സിനിമകളിൽ മഴ രംഗങ്ങൾ കുറക്കാൻ തീരുമാനിച്ചിരിക്കുകയാണ്. ഇനി മഴ രംഗങ്ങൾ നിർബന്ധം ആണെങ്കിൽ മറ്റ് സംസ്ഥാനങ്ങളിൽ പോയി ചിത്രീകരിക്കേണ്ടി വരും. ഒരു തരത്തിൽ പറഞ്ഞാൽ തമിഴ് സിനിമയിൽ ഒരു മഴ വിലക്കാണ് ഇപ്പോൾ ഏർപ്പെടുത്തിയിരിക്കുന്നത്.

കടുത്ത മഴയിൽ സൂപ്പർ നായകന്റെ കിടിലൻ മാസ്സ് ഇൻട്രോ സീനുകളും അതുപോലെ വമ്പൻ സംഘട്ടന രംഗങ്ങളും ആസ്വദിക്കുന്ന തമിഴ് സിനിമ പ്രേമികൾക്ക് വലിയ നിരാശ നൽകുന്ന ഒരു തീരുമാനം ആണ് ഇതെങ്കിലും, കടുത്ത ജല ക്ഷാമത്തെ തുടർന്ന് ജനങ്ങൾ വലയുമ്പോൾ സിനിമക്ക് വേണ്ടി ജലം പാഴാക്കുന്നത് ശെരിയല്ല എന്ന തമിഴ് സിനിമാ പ്രവർത്തകരുടെ ഈ തീരുമാനം സ്വാഗതാർഹമാണ്. സിനിമയിൽ മഴ രംഗങ്ങൾ ഉപയോഗിക്കുന്നതിന് നിയന്ത്രണം ഏർപ്പെടുത്തിയിട്ടുണ്ട് എങ്കിലും പൂർണ്ണമായും ഒഴിവാക്കാനാത്ത രംഗങ്ങൾ ആണെങ്കിൽ വളരെ കുറച്ചു വെള്ളം ഉപയോഗിച്ച് മഴ പെയ്യിക്കാം എന്നും അവർ വിശദീകരിക്കുന്നു. ഇതിന് മുൻപും ജല ക്ഷാമം ഉണ്ടായിട്ടുള്ള തമിഴ് നാട്ടിൽ ഇത്തരത്തിൽ മഴ രംഗങ്ങൾക്ക് വിലക്ക് ഏർപ്പെടുത്തിയിട്ടുണ്ട്. സൂപ്പർ സ്റ്റാർ രജനീകാന്ത് നായകനായ കാല, അജിത് നായകനായ വിശ്വാസം എന്നീ ചിത്രങ്ങളിലെ മഴ രംഗങ്ങള്‍ മുംബൈയിലും ഹൈദരാബാദിലും ചിത്രീകരിച്ചതിനു കാരണവും ജലക്ഷാമം തന്നെയാണ് എന്നാണ് അറിയാൻ കഴിയുന്നത്.