ഒരു പുരസ്‍കാര ദാന ചടങ്ങിൽ മമ്മൂട്ടിയോട് എങ്ങനെ ഈ സിനിമ ഇത്ര വൈകാരികമായി ചെയ്തു എന്ന് ചോദിച്ചപ്പോൾ ലഭിച്ച മറുപടി; വെളിപ്പെടുത്തി സംവിധായകൻ..!

മലയാളത്തിന്റെ മെഗാ സ്റ്റാർ മമ്മൂട്ടിയെ നായകനാക്കി പ്രശസ്ത തമിഴ് സംവിധായകൻ റാം ഒരുക്കിയ ചിത്രമാണ് പേരന്പ്. മമ്മൂട്ടി, സാധന എന്നിവർ മുഖ്യ വേഷങ്ങളിൽ അഭിനയിച്ച ഈ ചിത്രം വലിയ നിരൂപക പ്രശംസയാണ് നേടിയെടുത്തത്. രോഗ ബാധിതയായ മകൾക്കൊപ്പം ജീവിക്കുന്ന അമുദവൻ എന്ന അച്ഛൻ കഥാപാത്രത്തെയാണ് മമ്മൂട്ടി ഈ ചിത്രത്തിൽ അവതരിപ്പിച്ചത്. ഇപ്പോഴിതാ, ആ ചിത്രവുമായി ബന്ധപെട്ടു ഒരാൾ മമ്മൂട്ടിയോട് ചോദിച്ച ഒരു ചോദ്യവും അതിനു മമ്മൂട്ടി നൽകിയ ഉത്തരവും എന്തായിരുന്നു എന്ന് വെളിപ്പെടുത്തുകയാണ് സംവിധായകൻ റാം. ഒരു പുരസ്‌കാരദാന ചടങ്ങിൽ മമ്മൂക്കയോട് എങ്ങനെ ഈ സിനിമ ഇത്ര വൈകാരികമായി ചെയ്തു എന്നാണ് അവതാരകൻ ചോദിച്ചത്. അതിനു മമ്മൂട്ടി നൽകിയ മറുപടി, എന്റെ മകൾക്കാണ് ഇത് വന്നതെങ്കിൽ എന്ന് ഞാൻ ഉള്ളിൽ ചിന്തിച്ചു എന്നാണ്. മമ്മൂട്ടി പറഞ്ഞ ആ ഉത്തരത്തിൽ ആ നടന്റെയും ആ പിതാവിന്റെയും എല്ലാ വികാരങ്ങളും ഉണ്ടായിരുന്നു എന്നും റാം കൂട്ടിച്ചേർക്കുന്നു.

അതിമനോഹരമായി ആണ് മമ്മൂട്ടി ആ വേഷം ചെയ്തത് എന്നും ഒട്ടും നാടകീയത ഇല്ലാതെ മമ്മൂട്ടി അമുദവന് ജീവൻ പകർന്നെന്നും റാം പറഞ്ഞു. താൻ ഉദ്ദേശിക്കുന്നതിനു മുകളിൽ ഒരു നടൻ അഭിനയിക്കുമ്പോൾ ആണ് ഒരു സംവിധായകന് ഒട്ടും സമ്മർദം ഇല്ലാതെ ജോലി ചെയ്യാൻ കഴിയുന്നത് എന്നും, മമ്മൂട്ടിയെ പോലെ ഒരു മഹാനടനെ കിട്ടിയത് കൊണ്ടാണ് പേരന്പ് പോലുള്ള ചിത്രം ഇത്ര നന്നായി ചെയ്യാൻ തനിക്കു സാധിച്ചതെന്നും റാം പറയുന്നു. പാപ്പാ എന്ന മകൾ ആയി സാധനയും ഗംഭീര പ്രകടനം കാഴ്ച വെച്ച ചിത്രത്തിൽ അഞ്ജലി, അഞ്ജലി അമീർ എന്നിവരും നിർണ്ണായക വേഷങ്ങൾ ചെയ്തിട്ടുണ്ട്.