പാർവതിയാണോ നായിക, നീ തീർന്നടാ; തീരുന്നെങ്കിൽ തീരട്ടെ എന്ന് സംവിധായകൻ

ഈ വർഷം മലയാളത്തിൽ റിലീസ് ചെയ്ത ഏറ്റവും മികച്ച ചിത്രങ്ങളിൽ ഒന്നായിരുന്നു ഉയരെ. പാർവതി നായികാ വേഷത്തിൽ എത്തിയ ഈ ചിത്രം രചിച്ചത് ബോബി- സഞ്ജയ് ടീമും സംവിധാനം ചെയ്തത് നവാഗതനായ മനു അശോകനും ആയിരുന്നു. ബോക്സ് ഓഫീസിലും മികച്ച വിജയം നേടിയ ഈ ചിത്രം വലിയ നിരൂപക പ്രശംസയും നേടിയെടുത്തു. ആസിഡ് ആക്രമണത്തിൽ പരിക്കേറ്റ പല്ലവി എന്ന കേന്ദ്ര കഥാപാത്രമായി ഗംഭീര പ്രകടനമാണ് പാർവതി ഈ ചിത്രത്തിൽ കാഴ്ച വെച്ചത്. എന്നാൽ ഈ ചിത്രത്തിൽ പാർവതി ആണ് നായിക എന്ന വിവരം പുറത്തു വന്ന സമയത്തു തനിക്കു ലഭിച്ച ചില പ്രതികരണങ്ങൾ തുറന്നു പറയുകയാണ് ഉയരെ സംവിധായകൻ മനു അശോകൻ.

ഒട്ടേറെ ഭീഷണി സന്ദേശങ്ങൾ ആണ് തനിക്കു ലഭിച്ചത് എന്നാണ് മനു പറയുന്നത്. നീ തീർന്നടാ എന്നായിരുന്നു തനിക്കു ലഭിച്ച ഒരു സന്ദേശം എന്നും അങ്ങനെ തീരുകയാണെങ്കിൽ തീരട്ടെയെന്നു മറുപടിയും താൻ നൽകി എന്നും മനു അശോകൻ പറയുന്നു. ഇന്ത്യൻ രാജ്യാന്തര ചലച്ചിത്രമേളയിൽ ഉയരെയുടെ പ്രദർശനത്തിനു ശേഷം മാധ്യമങ്ങളുമായി നടത്തിയ മുഖാമുഖത്തിൽ ആണ് മനു അശോകൻ ഈ വെളിപ്പെടുത്തൽ നടത്തിയത്. പാർവതി എന്ന നടിയെ അല്ലാതെ മറ്റൊരാളെ ആ വേഷത്തിലേക്കു സങ്കൽപ്പിക്കാൻ പോലും പറ്റില്ലായിരുന്നു എന്നും മനു അശോകൻ പറയുന്നു.

സിദ്ദിഖ്, ആസിഫ് അലി, ടോവിനോ തോമസ്, പ്രതാപ് പോത്തൻ തുടങ്ങി ഒരു വലിയ താര നിര അണിനിരന്ന ചിത്രമാണ് ഉയരെ. ഈ ചിത്രം നിർമ്മിച്ചത് എസ് ക്യൂബ് ഫിലിമ്സിന്റെ ബാനറിൽ പി.വി. ഗംഗാധരന്റെ മക്കളായ ഷെനുഗ, ഷെഗ്ന, ഷെർഗ എന്നിവർ ചേർന്നാണ്. കഴിഞ്ഞ ദിവസം രാജ്യാന്തര ചലച്ചിത്ര മേളയിൽ പ്രദർശിപ്പിച്ച ഈ ചിത്രത്തിന് മികച്ച പ്രതികരണമാണ് അവിടെ നിന്നും ലഭിച്ചത്.