‘ഹൃദയ’ത്തിലെ പ്രണവിനെ മറന്നുപോയോ; മറുപടിയുമായി ഭദ്രന്‍……

വിനീത് ശ്രീനിവാസൻ രചിച്ചു സംവിധാനം ചെയ്ത ഹൃദയം എന്ന ചിത്രം വലിയ വിജയമാണ് നേടിയെടുത്തത്. ഈ വർഷം ജനുവരിയിൽ പുറത്തു വന്ന ഈ പ്രണവ് മോഹൻലാൽ ചിത്രം ഈ വർഷത്തെ മലയാളത്തിലെ ഏറ്റവും വലിയ വിജയവുമാണ്. അന്പത്തിയഞ്ചു കോടിക്ക് മുകളിൽ ആണ് ഹൃദയം നേടിയ വേൾഡ് വൈഡ് ഗ്രോസ്. ഇതിലെ അരുൺ നീലകണ്ഠൻ എന്ന കഥാപാത്രത്തെ അവതരിപ്പിച്ച പ്രണവ് മോഹൻലാൽ അതിഗംഭീര പ്രകടനമാണ് നൽകിയത്. വലിയ പ്രേക്ഷക പ്രശംസയും നിരൂപക പ്രശംസയും ഈ ചിത്രത്തിലൂടെ പ്രണവ് നേടിയെടുത്തു. ഇപ്പോഴിതാ പ്രണവ് എന്ന നടനെ കുറിച്ച് ഹൃദയം കണ്ട സംവിധായകൻ ഭദ്രന്റെ വാക്കുകൾ ശ്രദ്ധ നേടുകയാണ്.

ഭദ്രൻ കുറിച്ചത് ഇങ്ങനെ, “പ്രണവിനെ ഇഷ്ടപ്പെട്ട അനവധി ആരാധകർ വാട്സാപ്പിലൂടെ ചോദിച്ചുകൊണ്ടേയിരിക്കുന്നു, ഒരു അഭിനേതാവിന്റെ നല്ല പെർഫോമൻസിനെ കുറിച്ച് ആധികാരികമായി കുറിക്കുന്ന ഭദ്രൻ സർ എന്തേ ‘ഹൃദയ’ത്തിലെ പ്രണവിനെ മറന്നു പോയി. സത്യസന്ധമായും മറന്നതല്ല, എഴുതണമെന്ന് അന്ന് തോന്നി, പിന്നീട് അതങ്ങ് മറന്നു പോയി. പൂത്തുലഞ്ഞു നിൽക്കുന്ന വെള്ള ചെമ്പകപൂമരത്തിന്റെ തണ്ടിൽ വന്നിറങ്ങിയ ഒരു വെള്ളരിപ്രാവിനെ കണ്ടപോലെ തോന്നി, ‘ഹൃദയ’ത്തിലെ പ്രണവ്. എന്ത് ഗ്രേസ്ഫുൾ ആയിരുന്നു ഫസ്റ്റ് ഹാഫിലെ ആ മുഖപ്രസാദം. പറച്ചിലിലും ശരീരഭാഷയിലും കണ്ട ആ താളബോധം അച്ഛനിൽ നിന്നും പകർന്ന് കിട്ടിയ ആ സൂക്ഷ്മത പളുങ്ക് പോലെ സൂക്ഷിച്ചിരിക്കുന്നു..”. കല്യാണി പ്രിയദർശൻ, ദർശന രാജേന്ദ്രൻ എന്നിവരാണ് ഹൃദയത്തിലെ നായികാ വേഷങ്ങൾ ചെയ്തിരിക്കുന്നത്. മെരിലാൻഡ് സിനിമാസിന്റെ ബാനറിൽ വിശാഖ് സുബ്രമണ്യം ആണ് ഈ ചിത്രം നിർമ്മിച്ചത്.