പ്രണവിനോടുള്ള സ്നേഹം മനസ്സിലാക്കുന്നു, പക്ഷേ ലൊക്കേഷൻ ചിത്രങ്ങൾ അനുവാദം കൂടാതെ എടുക്കരുത് അപേക്ഷയുമായി അരുൺ ഗോപി..!

രാമലീല എന്ന ബ്ലോക്ക്ബസ്റ്റർ ദിലീപ് ചിത്രം ഒരുക്കി കൊണ്ട് അരങ്ങേറിയ അരുൺ ഗോപി, ഇപ്പോൾ തന്റെ രണ്ടാമത്തെ സംവിധാന സംരഭം ആയ ഇരുപത്തിയൊന്നാം നൂറ്റാണ്ടിന്റെ ചിത്രീകരണത്തിരക്കിൽ ആണ്. ആദി എന്ന ഈ വർഷത്തെ മലയാളത്തിലെ ആദ്യ ബ്ലോക്ക്ബസ്റ്റർ ചിത്രത്തിലൂടെ നായകനായി അരങ്ങേറ്റം കുറിച്ച പ്രണവ് മോഹൻലാൽ ആണ് ഇരുപത്തിയൊന്നാം നൂറ്റാണ്ടിലെ നായകൻ. മുളകുപ്പാടം ഫിലിംസിന്റെ ബാനറിൽ ടോമിച്ചൻ മുളകുപ്പാടം ആണ് ഈ ചിത്രം നിർമ്മിക്കുന്നത്. ഇപ്പോൾ ഈ ചിത്രത്തിലെ പ്രണവ് മോഹൻലാലിന്റെ ലൊക്കേഷൻ സ്റ്റില്ലുകൾ സോഷ്യൽ മീഡിയ വഴി വൈറൽ ആവുകയാണ്. പ്രണവിനെ കാണാൻ എത്തുന്ന ആരാധകരും സിനിമാ പ്രേമികളും മൈബൈൽ ഉപയോഗിച്ചു എടുക്കുന്ന ചിത്രങ്ങളും ലൊക്കേഷൻ വീഡിയോകളും ആണ് ഇങ്ങനെ പ്രചരിക്കുന്നത്. എന്നാൽ പ്രണവിനോടുള്ള സ്നേഹം മനസ്സിലാക്കുന്നു എന്നും, പക്ഷെ ലൊക്കേഷൻ സ്റ്റില്ലുകൾ ഷെയർ ചെയ്യരുത് എന്ന അപേക്ഷയുമായി സംവിധായകൻ അരുൺ ഗോപി ഇപ്പോൾ രംഗത്തു വന്നിരിക്കുകയാണ്.

അരുൺ ഗോപിയുടെ ഫേസ്ബുക്ക് പോസ്റ്റ് ഇങ്ങനെ, “പ്രിയമുള്ളവരേ നിങ്ങൾ നമ്മുടെ സിനിമയോടും പ്രണവിനോടും കാണിക്കുന്ന ഈ സ്‌നേഹത്തിനു സ്നേഹത്തോടെ തന്നെ നന്ദി പറയുന്നു. പക്ഷെ അതിന്റെ പേരിൽ ഞങ്ങളുടെ ലൊക്കേഷൻ സ്റ്റിൽസ് ഞങ്ങളുടെ അനുവാദമോ അറിവോ ഇല്ലാതെ ഷെയർ ചെയ്തു പ്രചരിപ്പിക്കരുത് എന്ന് വിനയത്തോടെ അഭ്യർത്ഥിക്കുന്നു, അതുമൂലം ഞങ്ങൾക്കുണ്ടാകുന്ന ബുദ്ധിമുട്ടുകൾ ദയവു ചെയ്തു മനസിലാക്കുക, സിനിമയ്ക്ക് പിന്നിലെ ചിന്തകൾ നിങ്ങൾ മാനിച്ചു ഞങ്ങൾക്കൊപ്പം നിൽക്കണമെന്ന് അഭ്യർത്ഥിക്കുന്നു”.

പ്രണവിന്റെ സർഫിങ് രംഗങ്ങൾ ആയിരിക്കും ഈ ചിത്രത്തിന്റെ ഹൈലൈറ്റ് എന്നാണ് സൂചന. മനോജ് കെ ജയൻ, കലാഭവൻ ഷാജോൺ, ധർമജൻ ബോൾഗാട്ടി, ജി സുരേഷ് കുമാർ എന്നിവരും ഈ ചിത്രത്തിൽ അഭിനയിക്കുന്നുണ്ട്. ആദ്യ ചിത്രമായ ആദിയിൽ പാർക്കർ സ്റ്റണ്ട് രംഗങ്ങൾ ഡ്യൂപ്പ് ഇല്ലാതെ ചെയ്ത് വിസ്മയിപ്പിച്ച താരമാണ് പ്രണവ് മോഹൻലാൽ.