സിബിഐ 5 ഇൽ ജോയിൻ ചെയ്തു പ്രശസ്ത താരം; ചിത്രം പങ്കുവെച്ച് സംവിധായകൻ

മെഗാ സ്റ്റാർ മമ്മൂട്ടിയെ നായകനാക്കി എസ് എൻ സ്വാമി രചിച്ച, കെ മധു സംവിധാനം ചെയ്ത സിബിഐ സീരീസിലെ ഏറ്റവും പുതിയ ചിത്രമാണ് സിബിഐ 5. ഇപ്പോൾ ചിത്രീകരണം നടക്കുന്ന ഈ ചിത്രത്തിന്റെ സെറ്റിൽ പ്രശസ്ത നടൻ ദിലീഷ് പോത്തൻ ജോയിൻ ചെയ്തു എന്ന വാർത്തയാണ് ഏറ്റവും പുതിയതായി വരുന്നത്. ഇതുവരെ നമ്മൾ സിബിഐ സീരിസിൽ കണ്ടു വന്ന ഒട്ടേറെ നടന്മാർക്ക് പകരം പുതിയ ആളുകൾ ആണ് ഈ അഞ്ചാം ഭാഗത്തിൽ പ്രത്യക്ഷപ്പെടുന്നത്. മമ്മൂട്ടിയും മുകേഷും മാത്രമേ ആദ്യ നാലു ഭാഗങ്ങളിൽ അഭിനയിച്ചവർ ആയി ഇപ്പോൾ ഈ അഞ്ചാം ഭാഗത്തിൽ ഉള്ളു. അപകടത്തിൽ പരിക്ക് പറ്റി അഭിനയ ജീവിതത്തിൽ നിന്ന് മാറി നിൽക്കുന്ന ജഗതി ശ്രീകുമാർ ഈ ചിത്രത്തിന്റെ ഭാഗമാകും എന്ന റിപ്പോർട്ടുകൾ വന്നിരുന്നു എങ്കിലും അതിനെക്കുറിച്ചു കൂടുതൽ ഒഫീഷ്യൽ ആയ വിവരങ്ങൾ പിന്നീട് വന്നില്ല. മമ്മൂട്ടിക്കൊപ്പം രൺജി പണിക്കർ, സായ്‌കുമാർ, രമേഷ് പിഷാരടി, ആശാശരത്ത്, സൗബിൻ ഷാഹിർ എന്നിവരും ഈ ചിത്രത്തിന്റെ താരനിരയിൽ ഉണ്ട്.

പുതുതലമുറയിലെ ശ്രദ്ധേയനായ ജേക്സ് ബിജോയ് സംഗീതമൊരുക്കുന്ന ഈ ചിത്രത്തിന് കാമറ ചലിപ്പിക്കുന്നത് അഖിൽ ജോര്ജും എഡിറ്റ് ചെയ്യുന്നത് ശ്രീകർ പ്രസാദുമാണ്. സംവിധായകൻ കെ മധുവിന്റെ നിർമ്മാണ ബാനറും ഒപ്പം സ്വർഗചിത്ര അപ്പച്ചനും ചേർന്നാണ് ഈ അഞ്ചാം ഭാഗം നിർമ്മിക്കുന്നത്. ജനുവരിയിൽ മമ്മൂട്ടിക്ക് കോവിഡ് ബാധിച്ചതിനെ തുടർന്ന് ഇതിന്റെ ഷൂട്ടിംഗ് നിർത്തി വെച്ചിരുന്നു. അതിനു ശേഷം വീണ്ടും ആരംഭിച്ചിരിക്കുന്ന ഷൂട്ടിങ്ങിൽ, ഫെബ്രുവരി രണ്ടാമത്തെ ആഴ്ച മുതൽ മമ്മൂട്ടി ജോയിൻ ചെയ്യുമെന്നുള്ള വിവരങ്ങൾ ആണ് ലഭിക്കുന്നത്. മമ്മൂട്ടിയുടെ ഈ ചിത്രത്തിലെ ലുക്ക് നേരത്തെ തന്നെ സോഷ്യൽ മീഡിയയിൽ വൈറലായി മാറിയിരുന്നു.