സൂപ്പർ ഹീറോ ആവാൻ ജനപ്രിയനായകൻ; പറക്കും പപ്പൻ നിർമ്മിക്കാൻ ശ്രീ ഗോകുലം മൂവീസ്

ജനപ്രിയ നായകൻ ദിലീപ് ലോക്കൽ സൂപ്പർ ഹീറോ ആയി എത്തുന്ന പറക്കും പപ്പൻ എന്ന ചിത്രം പ്രഖ്യാപിച്ചിട്ട് ഇപ്പോൾ 2 വർഷത്തിൽ കൂടുതലായി. നവാഗതനായ വിയാൻ വിഷ്ണു സംവിധാനം ചെയ്യാൻ പോകുന്ന ഈ ചിത്രം ഒരു മാസ്സ് എന്റർടൈൻമെന്റ് ചിത്രമാണെന്നും, അതിന്റെ പ്രീ പ്രൊഡക്ഷൻ ജോലികൾ പുരോഗമിക്കുകയാണെന്നും ദിലീപ് നേരത്തെ വെളിപ്പെടുത്തിയിരുന്നു.

ഇപ്പോൾ ലഭിക്കുന്ന റിപ്പോർട്ടുകൾ പ്രകാരം ഈ ചിത്രത്തിന്റെ നിർമ്മാണ പങ്കാളി ആയി ഗോകുലം ഗോപാലന്റെ ശ്രീ ഗോകുലം മൂവീസ് കൂടെ എത്തിക്കഴിഞ്ഞു. ദിലീപിന്‍റെ ഉടമസ്ഥതയിലുള്ള ഗ്രാന്‍ഡ് പ്രൊഡക്ഷന്‍സും കാര്‍ണിവല്‍ മോഷന്‍ പിക്ചേഴ്സും ചേർന്ന് നിർമ്മിക്കാൻ പ്ലാൻ ചെയ്ത ചിത്രമാണിത്. കാർണിവൽ മോഷൻ പിക്ചേഴ്സ് പിന്മാറിയത് കൊണ്ടാണ് ആ സ്ഥാനത്തേക്ക് ഗോകുലം മൂവീസ് എത്തിയതെന്നാണ് സ്ഥിരീകരിക്കാത്ത വാർത്തകൾ പറയുന്നത്.

അടുത്ത വർഷം ആരംഭിക്കാൻ പ്ലാൻ ചെയ്യുന്ന ചിത്രം വമ്പൻ ബഡ്ജറ്റിലാണ് ഒരുക്കുന്നത്. പ്രശസ്ത സംവിധായകനും രചയിതാവും നടനുമായ റാഫി തിരക്കഥ രചിക്കുന്ന ഈ ഫാന്റസി ആക്ഷൻ കോമഡി ചിത്രത്തിന്റെ പ്രീ പ്രൊഡക്ഷൻ ജോലികൾ അവസാന ഘട്ടത്തിലാണെന്നും വാർത്തകളുണ്ട്. നവാഗതനായ ബിന്റോ സ്റ്റീഫൻ ഒരുക്കുന്ന പ്രിൻസ് ആൻഡ് ഫാമിലി, നവാഗതനായ ധനഞ്ജയ് ശങ്കർ ഒരുക്കുന്ന ഭ ഭ ബ എന്നിവയാണ് ദിലീപ് നായകനായി ഇനി പ്രേക്ഷകരുടെ മുന്നിലെത്താനുള്ള ചിത്രങ്ങൾ.