ദിലീപ്- ധ്യാൻ ശ്രീനിവാസൻ- മാജിക് ഫ്രെയിംസ് ചിത്രം “പ്രിൻസ് ആൻഡ് ഫാമിലി”; ഫസ്റ്റ് ലുക്ക് പുറത്ത്

ജനപ്രിയ നായകൻ ദിലീപിനെ നായകനാക്കി നവാഗതനായ ബിന്റോ സ്റ്റീഫൻ സംവിധാനം ചെയ്യുന്ന ചിത്രത്തിന്റെ ടൈറ്റിലും ഫസ്റ്റ് ലുക്കും പുറത്ത്. പ്രിൻസ് ആൻഡ് ഫാമിലി എന്ന് പേരിട്ടിരിക്കുന്ന ഈ ചിത്രത്തിൽ ധ്യാൻ ശ്രീനിവാസനും പ്രധാന കഥാപാത്രത്തെ അവതരിപ്പിക്കുന്നുണ്ട്. ദിലീപ് നായകനാവുന്ന 150-ാമത്തെ ചിത്രമായ പ്രിൻസ് ആൻഡ് ഫാമിലി നിർമ്മിച്ചിരിക്കുന്നത് മാജിക് ഫ്രെയിംസിന്‍റെ ബാനറില്‍ ലിസ്റ്റിന്‍ സ്റ്റീഫന്‍ ആണ്. ലിസ്റ്റിൻ സ്റ്റീഫൻ നിര്‍മ്മിക്കുന്ന ആദ്യ ദിലീപ് ചിത്രവും, അവരുടെ മുപ്പതാം നിർമ്മാണ സംരംഭവുമാണ് പ്രിൻസ് ആൻഡ് ഫാമിലി. ദിലീപിന്റെ ജന്മദിനം പ്രമാണിച്ചാണ് ഈ ചിത്രത്തിന്റെ ഫസ്റ്റ് ലുക്ക് പുറത്ത് വിട്ടത്.

മാജിക് ഫ്രെയിംസ് നിർമ്മിച്ച നിർമ്മിച്ച ജനഗണമന, മലയാളി ഫ്രം ഇന്ത്യ എന്നീ ചിത്രങ്ങൾക്ക് ശേഷം ഷാരിസ് മുഹമ്മദ് രചന നിർവഹിക്കുന്ന ഈ ചിത്രം ഒരു ഫാമിലി എന്റർടൈനറായാണ് ഒരുക്കിയിരിക്കുന്നത്. ദിലീപ്, ധ്യാൻ ശ്രീനിവാസൻ, സിദ്ദിഖ്, ബിന്ദു പണിക്കർ, മഞ്ജു പിള്ള, ജോണി ആന്റണി, ജോസ് കുട്ടി എന്നീ പ്രമുഖ താരങ്ങളെ കൂടാതെ നിരവധി പുതിയ മുഖങ്ങളും ചിത്രത്തിന്റെ താരനിരയിലുണ്ട്. ഛായാഗ്രഹണം- രൺദിവെ, സംഗീതം- സനൽ ദേവ്.

ഉപചാരപൂർവ്വം ഗുണ്ട ജയൻ, നെയ്മർ, ജനഗണമന, മലയാളി ഫ്രം ഇന്ത്യ എന്നീ ചിത്രങ്ങൾക്ക് ചീഫ് അസോസിയേറ്റ് ഡയറക്ടറായി പ്രവർത്തിച്ച ബിന്റോ സ്റ്റീഫന്റെ ആദ്യ ചിത്രമാണ് പ്രിൻസ് ആൻഡ് ഫാമിലി. എറണാകുളത്തും പരിസര പ്രദേശങ്ങളിലുമായി പ്രധാനമായും ചിത്രീകരിച്ച ഈ ചിത്രം എഡിറ്റ് ചെയ്യുന്നത് സാഗർ ദാസ്. ക്രിസ്മസ് ചിത്രമായി പ്രിൻസ് ആൻഡ് ഫാമിലി റിലീസ് ചെയ്യാനുള്ള ശ്രമത്തിലാണ് അണിയറ പ്രവർത്തകർ.