ഇതൊരു മാസ്സ് എന്റർടൈൻമെന്റ്; പറക്കും പപ്പനെ കുറിച്ച് കൂടുതൽ വെളിപ്പെടുത്തി ദിലീപ്

കഴിഞ്ഞ വർഷം ഒടിടി റിലീസായി നെറ്റ്ഫ്ലിക്സിലെത്തി ലോകം മുഴുവൻ ശ്രദ്ധ നേടിയ മലയാളം സൂപ്പർ ഹീറോ ചിത്രമാണ് മിന്നൽ മുരളി. ബേസിൽ ജോസഫ് സംവിധാനം ചെയ്ത ഈ ചിത്രത്തിൽ ടോവിനോ തോമസ് ആയിരുന്നു നായകനായി അഭിനയിച്ചത്. ഈ ചിത്രത്തിന് ഒരു രണ്ടാം ഭാഗം ഉണ്ടാവുമെന്നും സംവിധായകൻ പറഞ്ഞിരുന്നു. എന്നാൽ അതിനു മുൻപ് മറ്റൊരു സൂപ്പർ ഹീറോ കൂടി മലയാളികൾക്ക് മുന്നിലെത്തും. മലയാളത്തിന്റെ ജനപ്രിയ നായകൻ ദിലീപ് പ്രധാന വേഷം ചെയ്യാൻ പോകുന്ന പറക്കും പപ്പൻ എന്ന ചിത്രമാണത്. ദേശി സൂപ്പർ ഹീറോ എന്ന രീതിയിൽ ഒരു സാധാരണക്കാരൻ സൂപ്പർ ഹീറോ ആവുന്ന രസകരമായ കഥയാണ് ഈ ചിത്രം പറയുന്നതെന്നാണ് സൂചന. നവാഗതനായ വിയാൻ വിഷ്ണു സംവിധാനം ചെയ്യാൻ പോകുന്ന ഈ ചിത്രത്തെ കുറിച്ച് കൂടുതൽ വെളിപ്പെടുത്തുകയാണിപ്പോൾ ദിലീപ്. ഓൺലൂകേർസ് മീഡിയക്ക് നൽകിയ അഭിമുഖത്തിലാണ് ദിലീപ് ഈ ചിത്രത്തെ കുറിച്ച് തുറന്നു സംസാരിക്കുന്നത്.

ഇതൊരു മാസ്സ് എന്റർടൈൻമെന്റ് ചിത്രമാണെന്നും, അതിന്റെ പ്രീ പ്രൊഡക്ഷൻ ജോലികൾ പുരോഗമിക്കുകയാണെന്നും ദിലീപ് പറയുന്നു. അദ്ദേഹം ഇപ്പോൾ ചെയ്ത് പൂർത്തിയാക്കാൻ പോകുന്ന വോയിസ് ഓഫ് സത്യനാഥൻ എന്ന ചിത്രം കഴിഞ്ഞാൽ, പറക്കും പപ്പൻ ആരംഭിക്കുമെന്നാണ് സൂചന. പ്രശസ്ത സംവിധായകനും രചയിതാവും നടനുമായ റാഫി തിരക്കഥ രചിക്കുന്ന ഈ ഫാന്റസി ആക്ഷൻ കോമഡി ചിത്രം ദിലീപും കാർണിവൽ ഗ്രൂപ്പും ചേർന്നാണ് നിർമ്മിക്കാൻ പോകുന്നത്. രണ്ടു വർഷങ്ങൾക്കു മുൻപ് പുറത്തു വിട്ട ഇതിന്റെ ടൈറ്റിൽ പോസ്റ്റർ ഏറെ ശ്രദ്ധ നേടിയെടുത്തിരുന്നു. വോയിസ് ഓഫ് സത്യനാഥന്റെ ബാക്കി നിൽക്കുന്ന ചിത്രീകരണം ഈ മാസം തുടങ്ങുമെന്നാണ് സൂചന.