ദിലീപ് അമ്മയിൽ നിന്ന് സ്വയം രാജിവെച്ചതല്ല; രാജി വെച്ചത് മോഹൻലാൽ നിർദേശിച്ചത് പ്രകാരം..!!

നടിയെ ആക്രമിച്ച കേസിൽ കുറ്റാരോപിതനായ നടൻ ദിലീപിനെ താര സംഘടനയായ അമ്മയിൽ നിന്ന് പുറത്താക്കണം എന്ന ആവശ്യം എല്ലാ കോണിൽ നിന്നും ഉയർന്നിരുന്നു. ആ സാഹചര്യത്തിൽ ദിലീപ് അമ്മയിലെ അംഗത്വം രാജി വെക്കുകയും ചെയ്തിരുന്നു. അമ്മയുടെ പ്രസിഡന്റ് ആയി കഴിഞ്ഞ വർഷം സ്ഥാനമേറ്റ സൂപ്പർ താരം മോഹൻലാൽ ആവശ്യപെട്ടിട്ടാണ് ദിലീപ് രാജി വെച്ചത്. എന്നാൽ രാജി വെച്ചതിനു ശേഷം ദിലീപ് പറഞ്ഞത് അമ്മയിലെ അംഗങ്ങൾക്ക് താൻ മൂലം ഒരു പ്രശ്നം ഉണ്ടാവാതെ ഇരിക്കാൻ താൻ സ്വയം രാജി വെക്കാൻ തീരുമാനിക്കുകയിരുന്നു എന്നാണ്. അതേ തുടർന്ന് വീണ്ടും ചിലർ അമ്മക്ക് എതിരെ ആരോപണവും ആയി രംഗത്ത് വന്നിരുന്നു. ഇപ്പോഴിതാ ഇന്നലെ കൂടിയ അമ്മയുടെ ഇരുപത്തിയഞ്ചാമതു ജനറൽ ബോഡി യോഗത്തിൽ അവതരിപ്പിച്ച സംഘടനാ റിപ്പോർട്ട് പറയുന്നതും മോഹൻലാലിന്റെ നിർദേശ പ്രകാരം തന്നെയാണ് ദിലീപ് രാജി വെച്ചത് എന്നാണ്.

ദിലീപ് സ്വമേധയാ ആണ് രാജി വെച്ചത് എന്ന വാദം ആണ് അവിടെ പൊളിഞ്ഞു വീണത്. അന്ന് ദിലീപ് സ്വമേധയാ ആണ് രാജി വെച്ചത് എന്ന വാദത്തെ പിന്തുണച്ചത് അമ്മയുടെ സെക്രട്ടറി ആയ സിദ്ദിഖ് ആയിരുന്നു. എന്നാൽ ഇന്നലെ സിദ്ദിഖ് ഇരിക്കെ തന്നെയാണ് ജനറൽ സെക്രട്ടറി ആയ ഇടവേള ബാബു സംഘടനാ റിപ്പോർട്ടിൽ മോഹൻലാലിന്റെ ആവശ്യപ്രകാരമാണ് ദിലീപ് രാജി വെച്ചത് എന്ന വസ്തുത ആവർത്തിച്ചു വ്യക്തമാക്കിയത്. കഴിഞ്ഞ വർഷത്തെ ജനറൽ ബോഡി യോഗത്തിൽ നടി ഊർമിള ഉണ്ണി ആണ് ദിലീപിനെ അമ്മയിലേക്കു തിരിച്ചെടുക്കണം എന്ന ആവശ്യം ഉന്നയിച്ചത്. മാത്രമല്ല, ദിലീപ് വിഷയത്തിൽ അമ്മയിൽ നിന്ന് രാജി വെച്ച് പുറത്തു പോയ നാല് നടിമാരുടെ രാജി അംഗീകരിച്ചു എന്നും പുതിയ റിപ്പോർട്ടിൽ പറഞ്ഞിട്ടുണ്ട്.