പൊട്ടിചിരിപ്പിക്കാൻ ദിലീപ് ഒരുങ്ങി കഴിഞ്ഞു; ദിലീപ് നാദിർഷ ചിത്രം ഉടൻ ഷൂട്ടിങ് ആരംഭിക്കുന്നു..

മലയാളികളുടെ പ്രിയങ്കരരായി മാറിയ കൂട്ടുകെട്ട് ദിലീപും നാദിർഷയും ഒന്നിക്കുന്ന ചിത്രം ഉടൻ ചിത്രീകരണം ആരംഭിക്കും. കേശു ഈ വീടിന്റെ നാഥൻ എന്നാണ് ചിത്രത്തിന് പേരിട്ടിരിക്കുന്നത്. മിമിക്രി വേദികൾ മുതൽ ഉറ്റ ചങ്ങാതിമാരായിരുന്ന ഇരുവരും സിനിമയിൽ തിളങ്ങിയെങ്കിലും നാദിർഷ ദിലീപിനെ നായകനാക്കി ഇതുവരെ ഒരു ചിത്രം സംവിധാനം ചെയ്തിരുന്നില്ല. എല്ലാ ചോദ്യങ്ങൾക്കുമുള്ള മറുപടിയാണ് ചിത്രത്തിലൂടെ നൽകുന്നത്. ചിത്രത്തിന്റെ ഷൂട്ടിംഗ് ഓഗസ്റ്റിൽ ആരംഭിക്കും, ചിത്രം പൂജ റിലീസായി തീയറ്ററുകളിൽ എത്തും. പൂജ റിലീസായി എത്തുന്ന ചിത്രമായ ഒടിയനൊപ്പമായിരിക്കും ദിലീപ് ചിത്രവും എത്തുക എന്നാണ് അറിയാൻ കഴിയുന്നത്.

എന്നും മലയാളി പ്രേക്ഷകരെ ചിരിപ്പിച്ചിട്ടുള്ള കൂട്ടുകെട്ട് വീണ്ടും ഒന്നിക്കുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത്, ഈ വർഷത്തെ ദേശീയ അവാർഡ് ജേതാവ് കൂടിയായ സജീവ് പാഴൂരാണ്. പൂർണ്ണമായും ഹാസ്യത്തിന് പ്രാധാന്യം നൽകിയാണ് ചിത്രം ഒരുക്കുന്നത്. ചിത്രത്തിൽ ദിലീപ് ഇരട്ട വേഷത്തിൽ എത്തുന്നു എന്ന പ്രത്യേകത കൂടിയുണ്ട്. വർഷങ്ങൾക്ക് ശേഷമാണ് ദിലീപ് ഒരു മുഴുനീള ഇരട്ട വേഷവുമായി എത്തുന്നത്.നാദിർഷയുടെ മുൻ ചിത്രമായ കട്ടപ്പനയിലെ ഹൃതിക് റോഷന്റെ നിർമ്മാതാവും ദിലീപായിരുന്നു. ആദ്യമായി നാദിർഷ സംവിധാനം ചെയ്ത അമർ അക്ബർ അന്തോണി ആ വർഷത്തെ ഏറ്റവും വലിയ ഹിറ്റുകളിൽ ഒന്നായി മാറിയിരുന്നു. വലിയ താര നിരയില്ലാതെ എത്തിയ രണ്ടാം ചിത്രവും ആ വർഷത്തെ വലിയ വിജയങ്ങളിൽ ഒന്നായി മാറി. രാമലീല, കമ്മാരസംഭവം തുടങ്ങിയ ചിത്രങ്ങളിലൂടെ വിജയ കുതിപ്പ് തുടരുന്ന ദിലീപും നാദിര്ഷയും ഒന്നിക്കുമ്പോൾ വലിയ വിജയം തന്നെ പ്രതീക്ഷിക്കാം.