ഒരുങ്ങുന്നത് മരണ മാസ്സ്; അഞ്ചു സംഘട്ടന സംവിധായകർക്കൊപ്പം ജനപ്രിയ നായകന്റെ ചിത്രം

ജനപ്രിയ നായകൻ ദിലീപ് പ്രധാന വേഷത്തിൽ എത്തുന്ന ജാക്ക് ഡാനിയൽ എന്ന ചിത്രത്തിന്റെ ഷൂട്ടിംഗ് പുരോഗമിക്കുകയാണ്. ദിലീപിനൊപ്പം തമിഴിലെ ആക്ഷൻ കിംഗ് അർജുനും ഈ ചിത്രത്തിൽ ഒരു പ്രധാന വേഷം ചെയ്യുന്നുണ്ട്. അവർ ആദ്യമായി ഒന്നിച്ചു അഭിനയിക്കുന്ന ചിത്രമാണ് ഇത്. ദിലീപിനെ നായകനാക്കി സ്‌പീഡ്‌ ട്രാക്ക് എന്ന ചിത്രം ഒരുക്കി അരങ്ങേറിയ എസ് എൽ പുരം ജയസൂര്യ സംവിധാനം ചെയ്യുന്ന ഈ മാസ്സ് ചിത്രത്തിൽ സംഘട്ടന രംഗങ്ങൾ ഒരുക്കുന്നത് അഞ്ചു വമ്പൻ സംഘട്ടന സംവിധായകർ ചേർന്നാണ്. ജാക്ക് എന്ന കള്ളൻ ആയി ദിലീപും ഡാനിയൽ എന്ന സി ബി ഐ ഓഫീസർ ആയി അർജുനും ഈ ചിത്രത്തിൽ അഭിനയിക്കുന്നു എന്നാണ് റിപ്പോർട്ടുകൾ പറയുന്നത്. പീറ്റർ ഹെയ്‌ൻ, കനൽ കണ്ണൻ, മാഫിയ ശശി, സുപ്രീം സുന്ദർ എന്നീ പ്രമുഖ സംഘട്ടന സംവിധായകരെ ആണ് ഈ ചിത്രത്തിലെ ആക്ഷൻ രംഗങ്ങൾ ഒരുക്കാൻ കൊണ്ട് വന്നിരിക്കുന്നത്.

അഞ്ജു കുര്യൻ നായികാ വേഷത്തിൽ എത്തുന്ന ഈ ചിത്രത്തിൽ സൈജു കുറുപ്പ്, ദേവൻ, ഇന്നസെന്റ്, ജനാർദ്ദനൻ, അശോകൻ, സുരാജ് വെഞ്ഞാറമൂട്, അജു വർഗീസ് എന്നിവരും അഭിനയിക്കുന്നുണ്ട്. എൻ ജി കെ, ഇരൈവി പോലത്തെ തമിഴ് ചിത്രങ്ങൾക്ക് കാമറ ചലിപ്പിച്ച ശിവ കുമാർ വിജയൻ കാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ഗോപി സുന്ദർ ആണ്. തമീൻ ഫിലിമ്സിന്റെ ബാനറിൽ വമ്പൻ ബഡ്ജറ്റിൽ ഈ ചിത്രം ഒരുക്കുന്നത് ഷിബു തമീൻസ് ആണ്. ഈ വർഷം പൂജ റിലീസ് ആയാവും ജാക്ക് ഡാനിയൽ എത്തുക എന്നറിയുന്നു.