ജനപ്രിയ നായകന്റെ ജനപ്രിയ ചിത്രമായി ‘വോയ്‌സ് ഓഫ് സത്യനാഥൻ’.

ജനപ്രിയ നായകൻ ദിലീപ് നായകനായ വോയ്‌സ് ഓഫ് സത്യനാഥൻ ഇപ്പോൾ ഗംഭീര പ്രേക്ഷക പ്രതികരണം നേടി പ്രദർശനം തുടരുകയാണ്. റാഫി രചിച്ചു സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് ബാദുഷ, ദിലീപ്, ഷിനോയ് മാത്യു എന്നിവർ ചേർന്നാണ്. ആദ്യാവസാനം ഹാസ്യത്തിലൂടെ കഥ പറയുന്ന ഈ ചിത്രം കുടുംബ പ്രേക്ഷകർ ഇരുകയ്യും നീട്ടി സ്വീകരിക്കുന്ന കാഴ്ചയാണ് കാണാൻ സാധിക്കുന്നത്. കേരളത്തിലെ തീയേറ്ററുകൾ നിറക്കുന്ന ദിലീപ് മാജിക് വീണ്ടും ആവർത്തിക്കുകയാണ് ഈ ചിത്രത്തിലൂടെ. മൂന്നര വർഷം കഴിഞ്ഞാണ് ഒരു ദിലീപ് ചിത്രം കേരളത്തിലെ തീയേറ്ററുകളിൽ എത്തുന്നതെന്നതും ഈ ചിത്രത്തിന് വമ്പൻ സ്വീകരണം ലഭിക്കുന്നതിന് കാരണമായിട്ടുണ്ട്. ഒട്ടേറെ സൂപ്പർ ഹിറ്റുകൾ നമ്മുക്ക് സമ്മാനിച്ചിട്ടുള്ള ദിലീപ്- റാഫി ടീം വീണ്ടും പ്രതീക്ഷകൾക്കൊത്തുയർന്നതോടെ ദിലീപിന്റെ വമ്പൻ തിരിച്ചു വരവിനാണ് കേരളം സാക്ഷ്യം വഹിക്കുന്നത്.

ആദ്യ ദിനം ഒന്നേമുക്കാൽ കോടിയോളം കളക്ഷൻ നേടിയ ഈ ചിത്രം ഈ വർഷം ഒരു മലയാള സിനിമ നേടുന്ന രണ്ടാമത്തെ വലിയ ഓപ്പണിങ് ആണ് സ്വന്തമാക്കിയത്. ദിലീപിനൊപ്പം ജോജു ജോർജ്, വീണ നന്ദകുമാർ, രമേശ് പിഷാരടി, ജഗപതി ബാബു, സിദ്ദിഖ്, ജോണി ആന്റണി തുടങ്ങി ഒരു വലിയ താരനിര തന്നെ ഈ ചിത്രത്തിൽ അണിനിരന്നിട്ടുണ്ട്. സത്യനാഥൻ എന്ന കഥാപാത്രമായി ദിലീപ് നടത്തിയ തകർപ്പൻ പ്രകടനം തന്നെയാണ് ചിത്രത്തിന്റെ ഹൈലൈറ്റ്. അങ്കിത് മേനോൻ സംഗീത സംവിധാനം നിർവഹിച്ച ഈ ചിത്രം എഡിറ്റ് ചെയ്തിരിക്കുന്നത് ഷമീർ മുഹമ്മദാണ്. കേരളത്തിലെ തീയേറ്ററുകളിൽ വീണ്ടും ജനപ്രവാഹത്തിന് കാരണമായി ജനപ്രിയ നായകൻ വീണ്ടും തന്റെ ജനപ്രീതി അരക്കിട്ടുറപ്പിക്കുകയാണ് വോയ്‌സ് ഓഫ് സത്യനാഥനിലൂടെ.