മാസും ക്ലാസ്സുമായി ധനുഷിന്റെ ആറാട്ട്; വാത്തിയുടെ പോരാട്ടം ഏറ്റെടുത്ത് പ്രേക്ഷകർ

തമിഴ് സൂപ്പർ താരം ധനുഷ് നായകനായി ഇന്നലെ ആഗോള വ്യാപകമായി റിലീസ് ചെയ്ത ചിത്രമാണ് വാത്തി. കേരളത്തിലും മികച്ച റിലീസാണ് ഈ ചിത്രത്തിന് ലഭിച്ചത്. വെങ്കി അറ്റ്‍ലൂരി രചിച്ചു സംവിധാനം ചെയ്ത ഈ ചിത്രം തമിഴിലും തെലുങ്കിലുമായാണ് ഒരുക്കിയിരിക്കുന്നത്. ഗംഭീര പ്രിവ്യു റിപ്പോർട്ടുകളുടെ അകമ്പടിയോടെ എത്തിയ ഈ ചിത്രം ഇന്നലെ ആദ്യത്തെ ഷോ കഴിഞ്ഞപ്പോൾ മുതൽ പ്രേക്ഷകരും ഏറ്റെടുത്തിരിക്കുകയാണ്. മികച്ച പ്രേക്ഷക പ്രതികരണമാണ് ഈ ചിത്രത്തിന് ലഭിക്കുന്നത്. ആഗോള തലത്തിൽ മികച്ച ബോക്സ് ഓഫിസ് കളക്ഷനും ആദ്യം ദിനം നേടിയ ഈ ചിത്രത്തിന്റെ ഹൈലൈറ്റ്, അത് ചർച്ച ചെയ്യുന്ന വിഷയവും, അത്പോലെ ധനുഷ് കാഴ്ച വെച്ച പ്രകടനവുമാണ്. വിദ്യാഭ്യാസ കച്ചവടം പ്രമേയമാകുന്ന ഈ ചിത്രത്തിൽ ബാലകുമരൻ എന്ന അധ്യാപകന്റെ വേഷത്തിലാണ് ധനുഷ് എത്തുന്നത്.

അദ്ദേഹത്തിന്റെ ആക്ഷൻ സീനുകൾക്കും ഡയലോഗുകൾക്കും വലിയ കയ്യടിയാണ് പ്രേക്ഷകർ നൽകുന്നത്. തമിഴിലെ മികച്ച നടന്മാരൊലൊരാളായ ധനുഷ് തന്റെ പ്രകടനം കൊണ്ട് തന്നെയാണ് ഈ ചിത്രത്തെ താങ്ങി നിർത്തുന്നത്. ഒരേ സമയം മാസും ക്ലാസ്സുമായാണ് ധനുഷിന്റെ പകർന്നാട്ടം. വളരെ സാമൂഹിക പ്രസക്തിയുള്ള ഒരു പ്രമേയം ഏറെ എന്റർടൈനിംഗ് ആയി പറയാൻ സാധിച്ചതാണ് ഈ ചിത്രത്തെ പ്രേക്ഷകർ ഏറ്റെടുക്കുന്നതിന്റെ കാരണം. മലയാളി നായികാ താരം സംയുക്ത മേനോൻ നായികാ വേഷം ചെയ്തിരിക്കുന്ന ഈ ചിത്രത്തിൽ സായ് കുമാര്‍, തനികേല ഭരണി, സമുദ്രക്കനി, തോട്ടപ്പള്ളി മധു, ആടുകളം നരേന്‍, ഇളവരസ് ഹരീഷ് പേരാടി, പ്രവീണ എന്നിവരും അഭിനയിച്ചിരിക്കുന്നു. ജി വി പ്രകാശ് കുമാർ ഒരുക്കിയ സംഗീതവും ഈ ചിത്രത്തിന് മുതൽക്കൂട്ടായി മാറിയിട്ടുണ്ട്.