ധനുഷ് സംവിധായകനാവുന്ന രായൻ ഒരുങ്ങുന്നു; താരനിരയിൽ മലയാളി യുവ താരവും

തമിഴിലെ യുവ സൂപ്പർതാരമായ ധനുഷ് വീണ്ടും സംവിധായകനാവുകയാണ്. 2017 ഇൽ റിലീസ് ചെയ്ത പാ പാണ്ടി എന്ന ചിത്രമാണ് ധനുഷ് ആദ്യമായി രചിച്ചു സംവിധാനം ചെയ്തത്. രാജ്‌കിരൺ, രേവതി, പ്രസന്ന എന്നിവർ പ്രധാന വേഷങ്ങൾ ചെയ്ത ഈ ചിത്രത്തിൽ ധനുഷ് അതിഥി വേഷത്തിലും അഭിനയിച്ചിരുന്നു. ഇപ്പോഴിതാ അഞ്ച് വർഷത്തിന് ശേഷം ധനുഷ് വീണ്ടും സംവിധായകനായി എത്തുകയാണ്. രായൻ എന്ന് പേരിട്ടിരിക്കുന്ന ഈ ബിഗ് ബഡ്ജറ്റ് ചിത്രം നിർമ്മിക്കാൻ പോകുന്നത് സൺ പിക്ചേഴ്സ് ആണ്. ഒരു ഗ്യാങ്സ്റ്റർ ചിത്രമായാണ് രായൻ ഒരുക്കുന്നതെന്നാണ് സൂചന. ഇപ്പോഴിതാ ഈ ചിത്രത്തിന്റെ താരനിരയെ കുറിച്ചുള്ള വാർത്തകളാണ് ശ്രദ്ധ നേടുന്നത്. വിഷ്ണു വിശാൽ നായകനായി എത്തുന്ന ഈ ചിത്രത്തിലെ വില്ലനായി എത്തുന്നത് എസ് ജെ സൂര്യ ആണ്. ദുഷാര വിജയൻ ആണ് ഇതിലെ പ്രധാന സ്ത്രീ കഥാപാത്രത്തിന് ജീവൻ പകരുക. ഇവർക്കൊപ്പം ഒരു മലയാളി യുവ താരവും ഇതിൽ നിർണ്ണായക വേഷം ചെയ്യുമെന്നാണ് വാർത്തകൾ വരുന്നത്.

ഇപ്പോൾ തമിഴിലും ഏറെ തിളങ്ങുന്ന മലയാളി നടൻ കാളിദാസ് ജയറാം ആയിരിക്കും ആ വേഷം ചെയ്യുക എന്നാണ് സൂചന. ഒരുപിടി തമിഴ് ചിത്രങ്ങളിൽ കാഴ്ചവെച്ച മികച്ച പ്രകടനങ്ങളിലൂടെ വലിയ കയ്യടിയാണ് അടുത്തിടെ കാളിദാസ് ജയറാം നേടിയെടുത്തത്. പാവൈ കഥകൾ എന്ന നെറ്റ്ഫ്ലിക്സ് ആന്തോളജി സീരിസിലെ ഒരു ചിത്രത്തിലും, പാ രഞ്ജിത്തിന്റെ നചതിരം നഗർഗിരത് എന്ന ചിത്രത്തിലും നൽകിയ പ്രകടനം കാളിദാസ് ജയറാമിന് വലിയ ശ്രദ്ധ നേടിക്കൊടുത്തിരുന്നു. അതുപോലെ തന്നെ ലോകേഷ് കനകരാജ് ഒരുക്കിയ വിക്രം എന്ന കമൽ ഹാസൻ ചിത്രത്തിലെ ചെറിയ വേഷവും മികച്ച രീതിയിലാണ് കാളിദാസ് ജയറാം അവതരിപ്പിച്ചത്.