സൂപ്പർ സ്റ്റാർ രജനികാന്തിനെ നായകനാക്കി ചിത്രം സംവിധാനം ചെയ്യാൻ ധനുഷ്..!

തമിഴ് സിനിമയുടെ പുതു തലമുറയിലെ ഏറ്റവും മികച്ച നടന്മാരിലൊരാളാണ് ധനുഷ്. നടനെന്ന നിലയിൽ മാത്രമല്ല താരമെന്ന നിലയിലും തമിഴിൽ തന്റേതായ സ്ഥാനമുള്ള ധനുഷ് പവർ പാണ്ടി എന്ന ഹിറ്റ് ചിത്രത്തിലൂടെ സംവിധായകനായും തന്റെ കഴിവ് തെളിയിച്ചിട്ടുണ്ട്. നടൻ, നിർമ്മാതാവ്, സംവിധായകൻ, ഗായകൻ, ഗാന രചയിതാവ്, തിരക്കഥാ രചയിതാവ് തുടങ്ങി ഒട്ടേറെ മേഖലകളിൽ കഴിവ് തെളിയിച്ച ധനുഷ് ഇപ്പോൾ തന്റെ അടുത്ത സംവിധാന സംരഭംത്തിന്റെ പണിപ്പുരയിലാണ് എന്ന റിപ്പോർട്ടുകളാണ് വരുന്നത്. സൂപ്പർ സ്റ്റാർ രജനികാന്ത് ആയിരിക്കും ഈ ചിത്രത്തിൽ നായകനെന്നും സ്ഥിതീകരിക്കാത്ത റിപ്പോർട്ടുകൾ സൂചിപ്പിക്കുന്നു. രജനികാന്തിന്റെ മകൾ ഐശ്വര്യയാണ് ധനുഷിന്റെ ഭാര്യ. സ്വന്തം ഭാര്യാ പിതാവ് കൂടിയായ സൂപ്പർ താരത്തെ നായകനാക്കി ധനുഷ് ഒരു ചിത്രമൊരുക്കുന്നത് കാത്തിരിക്കുകയാണ് ഇരുവരുടേയും ആരാധകർ. നേരത്തെ രജനികാന്തിനെ നായകനാക്കി പാ രഞ്ജിത്ത് സംവിധാനം ചെയ്ത കാലാ എന്ന ചിത്രത്തിന്റെ നിർമ്മാണ പങ്കാളി കൂടിയായിരുന്നു ധനുഷ്.

രജനികാന്തിനെ നായകനാക്കി സിനിമ സംവിധാനം ചെയ്യാൻ ആഗ്രഹമുണ്ടെന്നു ഈ അടുത്തിടെയാണ് ധനുഷ് വെളിപ്പെടുത്തിയത്. രജനികാന്തിനെ നായകനാക്കി സിനിമ സംവിധാനം ചെയ്യാൻ ആരും കൊതിക്കുമെന്നും അദ്ദേഹം പറയുന്നു. ഇപ്പോൾ ശിവ സംവിധാനം ചെയ്യുന്ന അണ്ണാത്തെ എന്ന ചിത്രത്തിലാണ് രജനികാന്ത് അഭിനയിക്കുന്നത്. ലോകേഷ് കനകരാജ് ഒരു രജനികാന്ത് ചിത്രം പ്ലാൻ ചെയ്യുന്നു എന്നും അത് നിർമ്മിക്കുന്നത് കമൽ ഹാസൻ ആണെന്നും വാർത്തകൾ വന്നിരുന്നു. ഏതായാലും രജനികാന്ത് ചിത്രത്തിന് മുൻപ് നാൻ രുദ്രൻ എന്നൊരു ചിത്രം ധനുഷ് സംവിധാനം ചെയ്യുന്നുണ്ട്. നാഗാര്‍ജുനയും എസ് ജെ സൂര്യയും അഭിനയിക്കുന്ന ഈ ചിത്രത്തിന് ശേഷമാകും രജനികാന്ത് ചിത്രത്തിന്റെ ജോലികളിലേക്ക് കടക്കുക. കാർത്തിക് സുബ്ബരാജ് ഒരുക്കിയ ജഗമേ തന്തിരം, മാരി സെൽവരാജിന്റെ കർണ്ണൻ, ആനന്ദ് എൽ റായ് ഒരുക്കുന്ന ബോളിവുഡ് ചിത്രം അത്രങ്കി രേ എന്നിവയാണ് ധനുഷ് അഭിനയിച്ചു പുറത്തു വരാനുള്ള ചിത്രങ്ങൾ.