ഗ്ലാമറിനൊപ്പം ആക്ഷനിലും തിളങ്ങാൻ ദീപിക; പത്താനെ വരവേൽക്കാൻ ഒരുങ്ങി ആരാധകർ

ബോളിവുഡ് കിംഗ് ഖാൻ ഷാരൂഖ് ഖാൻ നായകനായി എത്തുന്ന ഏറ്റവും പുതിയ ചിത്രമാണ് പത്താൻ. ദീപിക പദുക്കോൺ നായികാ വേഷം ചെയ്യുന്ന ഈ ചിത്രം ജനുവരി ഇരുപത്തിയഞ്ചിനാണ്‌ റിലീസ് ചെയ്യുക. ഹിന്ദി, തമിഴ്, തെലുങ്ക് ഭാഷകളിൽ പാൻ ഇന്ത്യൻ റിലീസായി എത്താൻ പോകുന്ന ഈ ചിത്രം ചില വിവാദങ്ങളിലും ചെന്ന് ചാടിയിരുന്നു. ഇതിലെ ഒരു ഗാന രംഗത്തിൽ ഗ്ലാമർ പ്രദർശനവുമായി എത്തിയ ദീപിക പദുക്കോണിന്റെ വസ്ത്രത്തിന്റെ നിറവുമായി ബന്ധപ്പെട്ടായിരുന്നു വിവാദം. ഇപ്പോഴിതാ ഇതിൽ ഗ്ലാമർ മാത്രമല്ല, ദീപികയുടെ കിടിലൻ ആക്ഷനും ഉണ്ടെന്ന സൂചന നൽകികൊണ്ട്, താരത്തിന്റെ പുത്തൻ മാസ്സ് പോസ്റ്റർ പുറത്ത് വിട്ടിരിക്കുകയാണ് അണിയറ പ്രവർത്തകർ. ഇന്ന് ജന്മദിനമാഘോഷിക്കുന്ന ദീപികയ്ക്ക് ആശംസകൾ അറിയിച്ചു കൊണ്ടാണ് ഈ പോസ്റ്റർ റിലീസ് ചെയ്തിരിക്കുന്നത്. വാർ എന്ന സൂപ്പർ മെഗാഹിറ്റ് ഹൃത്വിക് റോഷൻ- ടൈഗർ ഷറോഫ് ചിത്രത്തിന് ശേഷം സിദ്ധാർഥ് ആനന്ദ് ഒരുക്കുന്ന ഈ മെഗാ മാസ്സ് ആക്ഷൻ ത്രില്ലർ ചിത്രം നിർമ്മിക്കുന്നത് യാഷ് രാജ് ഫിലിംസ് ആണ്.

യാഷ് രാജ് ഫിലിംസിന്റെ 50 ആം ചിത്രമാണ് പത്താൻ. സൂപ്പർ താരം ജോൺ എബ്രഹാം വില്ലൻ വേഷം ചെയ്തിരിക്കുന്ന ഈ ചിത്രത്തിൽ, തന്റെ സൂപ്പർഹിറ്റ് സ്പൈ കഥാപാത്രമായ ടൈഗർ ആയി മെഗാസ്റ്റാർ സൽമാൻ ഖാൻ അതിഥി വേഷത്തിലും എത്തുന്നുണ്ട്. വിശാൽ ദഡ്ലാനി, ശേഖർ റവ്ജിയാണി, സഞ്ചിത് ബൽഹാര എന്നിവർ സംഗീത വിഭാഗം കൈകാര്യം ചെയ്തിരിക്കുന്ന ഈ ചിത്രത്തിലെ രണ്ട് ഗാനങ്ങൾ ഇപ്പോൾ സൂപ്പർ ഹിറ്റാണ്. ഇതിന്റെ ഒരു ടീസർ ആണ് നേരത്തെ പുറത്തു വന്നത്. ജനുവരി പത്തിനാണ് പത്താൻ ട്രൈലെർ റിലീസ് ചെയ്യാൻ പോകുന്നത് എന്നാണ് സൂചന.