ആരെ വേണമെങ്കിലും തല എന്ന് വിളിക്കാം.. പക്ഷെ അവർക്കെല്ലാം തല അജിത്തിന് താഴെ മാത്രമാണ് സ്ഥാനം…ശ്രീശാന്തിന്റെ വാക്കുകൾ ചർച്ചയാകുന്നു…

തമിഴിലെ ഏറ്റവും വലിയ താരം അജിത് കുമാർ. അജിത് കുമാർ എന്നതിലുപരി തല അജിത് എന്ന് പറയുന്നതാവും തമിഴ് പ്രേക്ഷകർക്ക് ഇഷ്ടം. എൻ വീട് എൻ കണവർ എന്ന ചിത്രത്തിലൂടെയായിരുന്നു അജിത് തമിഴ് സിനിമയിലേക്ക് അരങ്ങേറിയത് എങ്കിൽ കൂടിയും അമരാവതി എന്ന ചിത്രത്തിലൂടെയായിരുന്നു നായകനായി അജിത് പ്രേക്ഷക ഹൃദയങ്ങളിൽ ഇടം പിടിക്കുന്നത്.സംഗീത കുലപതി എസ്. പി ബാലസുബ്രഹ്മണ്യമാണ് അജിത്തിനെ അമരാവതിയിലൂടെ അന്ന് സിനിമയിലേക്ക് എത്തിച്ചത്. പിന്നീട് നിരവധി സൂപ്പർ ഹിറ്റുകൾ തുടർച്ചയായി കരസ്ഥമാക്കി അജിത് കുമാർ ഏവർക്കും പ്രിയങ്കരനായി മാറുകയായിരുന്നു. ഇതിനിടെയാണ് അജിത് കുമാർ പ്രേക്ഷകർക്ക് പ്രിയങ്കരനായ തലയായും മാറുന്നത്. മങ്കാത്ത എന്ന ചിത്രത്തിലൂടെയാണ് അജിത് കുമാർ മലയാളത്തിലും തന്റെ വരവ് അറിയിച്ചത്. ചിത്രം കേരളാ ബോക്സ്ഓഫീസിൽ വമ്പൻ വിജയം സൃഷ്ടിച്ചപ്പോൾ ആരാധകരെയും വളരെയധികം സൃഷ്ടിക്കാൻ അദ്ദേഹത്തിനായി. ഇപ്പോഴിതാ അദ്ദേഹത്തെ കുറിച്ചൊരു പരാമർശവുമായി കേരളത്തിൽ നിന്നുമുള്ള ഒരു താരം തന്നെ എത്തിയിരിക്കുകയാണ്.

കേരളീയരുടെ പ്രിയങ്കരനായ ക്രിക്കറ്റ് താരം ശ്രീശാന്താണ് അജിത് കുമാറിനെ കുറിച്ച് പറഞ്ഞത്. തല അജിത്തിന്റെ കടുത്ത ആരാധകൻ കൂടിയായ ശ്രീശാന്തിന്റെ വാക്കുകൾ ഇതാണ്. നമുക്ക് ആരെ വേണമെങ്കിലും തമാശ രൂപേനയോ അല്ലാതെയോ തല എന്ന് വിളിക്കാം എന്നാൽ അവർ എല്ലാം തല അജിത്തിന് താഴെ മാത്രമാണ്. ചെന്നൈയിൽ മാത്രമല്ല ലോകത്ത് എവിടെ പോയാലും തല എന്നാൽ ആദ്യം പ്രേക്ഷകരുടെ മനസിലേക്ക് ഓടി വരുക തല അജിത് ആയിരിക്കും. ഐ. പി. എല്ലിലെ ചെന്നൈ സൂപ്പർ കിങ്‌സ് ടീമിന്റെ നമ്മ തല ധോണി തുടങ്ങിയ പരസ്യ വാചകത്തെയും കൂടി ഉദ്ദേശിച്ചാണ് ശ്രീശാന്തിന്റെ ഈ വാക്കുകൾ. അതിനാൽ തന്നെ ശ്രീശാന്തിന്റെ വാക്കുകൾ ശ്രദ്ധേയമാവുകയാണ്. എന്തായാലും ധോണി ആരാധകരും തല അജിത് ആരാധകരും ശ്രീശാന്തിന്റെ ഈ വാക്കുകൾ ഇതിനോടകം തന്നെ വലിയ രീതിയിൽ ഏറ്റെടുത്ത് കഴിഞ്ഞു.