താരനിബിഢമായ ചടങ്ങിൽ കോബ്ര ഓഡിയോ ലോഞ്ച്; ചിയാൻ വിക്രമും വേദിയിൽ

തമിഴകത്തിന്റെ സൂപ്പർ താരങ്ങളിൽ ഒരാളായ ചിയാൻ വിക്രം നായകനായി എത്തുന്ന ഏറ്റവും പുതിയ ചിത്രമാണ് കോബ്ര. ഈ വരുന്ന ഓഗസ്റ്റ് പതിനൊന്നിനാണ് കോബ്ര പ്രേക്ഷകരുടെ മുന്നിലെത്തുന്നത്. ഒട്ടേറെ ഗെറ്റപ്പുകളിൽ വിക്രമെത്തുന്ന ഈ ചിത്രം, ഇമൈക നൊടികൾ, ഡിമാൻഡി കോളനി എന്നീ സൂപ്പർഹിറ്റ് സിനിമകൾ സംവിധാനം ചെയ്ത ആർ. അജയ് ജ്ഞാനമുത്തുവാണ് സംവിധാനം ചെയ്തിരിക്കുന്നത്. ഒരു ആക്ഷൻ ത്രില്ലറായി ഒരുക്കിയിരിക്കുന്ന ഈ ചിത്രത്തിലെ ഗാനങ്ങൾ പുറത്ത് വരികയും വലിയ ശ്രദ്ധ നേടുകയും ചെയ്തിരുന്നു. ഇപ്പോഴിതാ ഇതിന്റെ ഓഡിയോ ലോഞ്ച് താരനിബിഢമായ ചടങ്ങിൽ ചെന്നൈയിൽ വെച്ച് നടന്നു. എ ആർ റഹ്മാൻ, ഇർഫാൻ പത്താൻ, ദ്രുവ് വിക്രം, റോഷൻ മാത്യു, ശ്രീനിധി ഷെട്ടി ,ഉദയനിധി സ്റ്റാലിൻ, കെ എസ് രവികുമാർ, മിയ ജോർജ്, ഡോക്ടർ അജയ് ജ്ഞാനമുത്തു തുടങ്ങി പ്രമുഖ വ്യക്തികൾ ഇതിൽ പങ്കെടുത്തു. ഇഫാർ മീഡിയായ്ക്ക് വേണ്ടി റാഫി മതിര ആണ് കേരളത്തിൽ ഈ ചിത്രം അവതരിപ്പിക്കുന്നത്. ഡ്രീം ബിഗ് ഫിലിംസും, ഇ ഫോർ എൻറ്റർടൈൻമെൻറ്റും ചേർന്ന് കോബ്ര ഇവിടുത്തെ സ്‌ക്രീനുകളിൽ എത്തിക്കും.

സെവൻ സ്ക്രീൻ സ്റ്റുഡിയോയുടെ ബാനറിൽ എസ്.എസ്. ലളിത് കുമാർ നിർമ്മിച്ചിരിക്കുന്ന ഈ ചിത്രത്തിൽ കെ ജി എഫ് സീരിസിലൂടെ ജനപ്രീതി നേടിയ ശ്രീനിധി ഷെട്ടിയാണ് നായികാ വേഷത്തിൽ എത്തിയിരിക്കുന്നത്. ഇന്ത്യൻ ക്രിക്കറ്റ് താരം ഇർഫാൻ പത്താൻ ഒരു പ്രധാന വേഷം ചെയ്യുന്ന ഈ ചിത്രത്തിൽ മലയാളി താരങ്ങളായ റോഷൻ മാത്യു, സർജാനോ ഖാലിദ്, മിയ, കനിഹ, പദ്മപ്രിയ, മാമുക്കോയ, ബാബു ആൻറ്റണി എന്നിവരും വേഷമിട്ടിരിക്കുന്നു. ഈ ഓഡിയോ ലോഞ്ചിൽ വളരെ രസകരമായാണ് വിക്രം സംസാരിച്ചത്. ആശുപത്രിയിലായ സാഹചര്യത്തിൽ തന്നെക്കുറിച്ച് വന്ന വാർത്തകളെ കുറിച്ചാണ് അദ്ദേഹം സരസമായി പ്രതികരിച്ചത്. ഹരീഷ് കണ്ണൻ ക്യാമറ ചലിപ്പിച്ച കോബ്ര എഡിറ്റ് ചെയ്തിരിക്കുന്നത് ഭുവൻ ശ്രീനിവാസനാണ്.