കായംകുളം കൊച്ചുണ്ണിക്ക്‌ ആശംസകളുമായി ബ്രഹ്മാണ്ഡ ബോളിവുഡ് ചിത്രങ്ങളുടെ ക്യാമറാമാൻ..!

മലയാള സിനിമാ പ്രേമികൾ ഏറെ കാത്തിരിക്കുന്ന ബ്രഹ്മാണ്ഡ ചിത്രമാണ് നിവിൻ പോളിയെ നായകനാക്കി റോഷൻ ആൻഡ്രൂസ് സംവിധാനം ചെയ്ത കായംകുളം കൊച്ചുണ്ണി. മെഗാ സ്റ്റാർ മോഹൻലാൽ ഈ ചിത്രത്തിൽ അതിഥി വേഷത്തിൽ എത്തുന്നു എന്നതും ഇതിന്റെ സവിശേഷതയാണ്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിച്ച ഈ ബിഗ് ബജറ്റ് ചിത്രം ഏകദേശം നാൽപ്പത്തിയഞ്ച് കോടി രൂപ മുതൽ മുടക്കിയാണ് നിർമ്മിച്ചിരിക്കുന്നത്. അടുത്ത മാസം പതിനെട്ടിന് റിലീസിന് തയ്യാറെടുക്കുന്ന ഈ ചിത്രത്തിന് ആശംസകളുമായി ഇപ്പോൾ രംഗത്ത് വന്നിരിക്കുന്നത് പ്രശസ്ത ബോളിവുഡ് ക്യാമറാമാൻ ആയ സുധീപ് ചാറ്റർജി ആണ്. ബോളിവുഡിലെ ബ്രഹ്മാണ്ഡ ചിത്രങ്ങളുടെ ക്യാമറാമാൻ എന്ന നിലയിൽ പ്രശസ്തനായ ആളാണ് സുധീപ് ചാറ്റർജി.

ബാജി റാവു മസ്താനി, പദ്മാവതി , ചക് ദേ ഇന്ത്യ തുടങ്ങിയ ചിത്രങ്ങളിലൂടെ പ്രശസ്തനായ സുദീപ് ചാറ്റർജി ട്വിറ്ററിൽ കായംകുളം കൊച്ചുണ്ണിയുടെ ട്രൈലെർ ഷെയർ ചെയ്തു കൊണ്ടാണ് ഈ ചിത്രത്തിന്റെ അണിയറ പ്രവർത്തകർക്ക് തന്റെ ആശംസയറിയിച്ചതു. ബോളിവുഡ് ക്യാമറാമാൻ ആയ ബിനോദ് പ്രധാൻ ആണ് കായംകുളം കൊച്ചുണ്ണിയുടെയും ഛായാഗ്രഹണം നിർവഹിച്ചിരിക്കുന്നത്. ഒട്ടേറെ പ്രശസ്തമായ ബോളിവുഡ് ചിത്രങ്ങളുടെ ക്യാമറാമാൻ ആണ് ബിനോദ് പ്രധാൻ. ബോബി- സഞ്ജയ് ടീം തിരക്കഥ ഒരുക്കിയ ഈ ചിത്രത്തിൽ സണ്ണി വെയ്ൻ , ബാബു ആന്റണി, പ്രിയ ആനന്ദ്, പ്രിയങ്ക തിമേഷ് തുടങ്ങി ഒരു വലിയ താര നിര തന്നെ അണിനിരന്നിട്ടുണ്ട്. മലയാളം പതിപ്പിനൊപ്പം തന്നെ ഈ ചിത്രത്തിന്റെ തമിഴ്- തെലുങ്കു പതിപ്പുകളും റിലീസ് ചെയ്യുമെന്നാണ് റിപ്പോർട്ടുകൾ പറയുന്നത്. ഗോപി സുന്ദർ ആണ് കായംകുളം കൊച്ചുണ്ണിക്ക്‌ സംഗീതം ഒരുക്കിയത്. കായംകുളം കൊച്ചുണ്ണി ആയി നിവിൻ എത്തുമ്പോൾ മോഹൻലാൽ എത്തുന്നത് ഇത്തിക്കര പക്കി ആയാണ്.