ഇന്ത്യയിൽ തന്നെ സൂക്ഷ്മാഭിനയം കാഴ്ചവെക്കുന്ന നടമാരിലൊരാളാണ് ദുൽഖർ; തുറന്ന് പറഞ്ഞ് പ്രമുഖ ബോളിവുഡ് സംവിധായകൻ

മലയാളത്തിന്റെ യുവ സൂപ്പർ താരങ്ങളിൽ ഒരാളായ ദുൽഖർ സൽമാൻ ഇപ്പോൾ തന്റെ മൂന്നാമത്തെ ബോളിവുഡ് ചിത്രം റിലീസ് ചെയ്യുന്നത് കാത്തിരിക്കുകയാണ്. കാർവാ, സോയ ഫാക്ടർ എന്നീ ബോളിവുഡ് ചിത്രങ്ങളിലാണ് ദുൽഖർ സൽമാൻ ഇതിന് മുൻപ് അഭിനയിച്ചത്. ആർ ബാൽകി സംവിധാനം ചെയ്ത ചുപ്: ദി റിവഞ്ച് ഓഫ് ആൻ ആർട്ടിസ്റ്റ് ആണ് ദുൽഖർ അഭിനയിച്ചു റിലീസ് ചെയ്യാൻ പോകുന്ന പുതിയ ബോളിവുഡ് ചിത്രം. ഒരു ക്രൈം ഇൻവെസ്റ്റിഗേഷൻ ത്രില്ലറായി ഒരുക്കിയിരിക്കുന്ന ഈ ചിത്രത്തിലൂടെ ബോളിവുഡിലെ തന്റെ ആദ്യ വിജയം കൂടിയാണ് ദുൽഖർ സൽമാൻ തേടുന്നത്. ഇപ്പോഴിതാ ഈ ചിത്രത്തിലേക്ക് ദുൽഖർ സൽമാനെ തിരഞ്ഞെടുത്തതിനുള്ള കാരണം വ്യക്തമാകുകയാണ് ഇതിന്റെ സംവിധായകനായ ആർ ബാൽകി. ഇന്ത്യൻ സിനിമയിലെ തന്നെ യുവ തലമുറയിൽ, സൂക്ഷ്മാഭിനയം കാഴ്ച വെക്കുന്ന നടന്മാരിലൊരാളാണ് ദുൽഖർ സൽമാനെന്നും, ഈ ചിത്രത്തിലെ കഥാപാത്രത്തിന് ആ പ്രകടനമാണ് വേണ്ടതെന്നു മനസ്സിലാക്കിയത് കൊണ്ടാണ് ദുൽഖർ സൽമാനെ വിളിച്ചതെന്നും ബാൽകി പറയുന്നു.

താൻ ഏറെ നാളായി ദുൽഖർ എന്ന നടനെ നിരീക്ഷിച്ചു വരികയാണെന്നും ആർ ബാൽകി വെളിപ്പെടുത്തി. ചീനി കം, പാ, ഷമിതാഭ്, കി ആന്‍ഡ് ക, പാഡ് മാന്‍ തുടങ്ങിയ ഗംഭീര ചിത്രങ്ങൾക്ക് ശേഷം ആർ ബാൽകി ഒരുക്കിയ ചിത്രമാണ് ചുപ്. സിനിമ നിരൂപകരെ തിരഞ്ഞു പിടിച്ചു വകവരുത്തുന്ന ഒരു സീരിയൽ കില്ലറും അയാളെ അന്വേഷിച്ചു പോകുന്ന ഒരു പോലീസ് ഓഫീസറുടെയും കഥയാണ് ഈ ചിത്രം പറയുന്നതെന്ന് സൂപ്പർ ഹിറ്റായ ഇതിന്റെ ട്രൈലെർ കാണിച്ചു തരുന്നു. ബോളിവുഡ് താരം സണ്ണി ഡിയോൾ ആണ് ഈ ചിത്രത്തിൽ ദുൽഖർ സൽമാനൊപ്പം പ്രധാന വേഷം ചെയ്യുന്നത്. ശ്രേയ ധന്വന്തരി, പൂജ ഭട്ട് എന്നിവരും നിർണ്ണായക വേഷങ്ങൾ ചെയ്യുന്ന ഈ ചിത്രം നിർമ്മിച്ചിരിക്കുന്നത് ഹോപ്പ് പ്രൊഡക്ഷന്സും പെൻ സ്റ്റുഡിയോസും ചേർന്നാണ്.