കൗമാരത്തിലേക്കെത്തുന്ന എല്ലാ പെൺകുട്ടികളും നിർബന്ധമായും കണ്ടിരിക്കേണ്ട ചിത്രം; ഗംഭീര പ്രതികരണം നേടി ചോല

സനൽ കുമാർ ശശിധരൻ സംവിധാനം ചെയ്ത്, ജോജു ജോർജ്, നിമിഷ സജയൻ, പുതുമുഖമായ അഖിൽ വിശ്വനാഥ് എന്നിവർ പ്രധാന വേഷങ്ങൾ ചെയ്ത ചോല എന്ന ചിത്രം ഗംഭീര പ്രതികരണം ആണ് ഇപ്പോൾ തീയേറ്ററുകളിൽ നിന്ന് നേടിയെടുക്കുന്നത്. ജോജു ജോർജ്, നിമിഷ സജയൻ എന്നിവരുടെ അതിഗംഭീര പ്രകടനം ആണ് ഈ ചിത്രത്തിന്റെ ഹൈലൈറ്റ്. ജോജു ജോർജ് തന്നെ നിർമ്മാണവും നിർവഹിച്ച ഈ ചിത്രം വളരെയധികം സമകാലിക പ്രസക്തിയുള്ള ഒരു വിഷയം ആണ് ചർച്ച ചെയ്യുന്നത്. കൗമാരത്തിലേക്ക് എത്തുന്ന എല്ലാ പെൺകുട്ടികളും നിർബന്ധമായും കണ്ടിരിക്കേണ്ട ഒരു ചിത്രം എന്നാണ് പ്രേക്ഷകരും നിരൂപകരും ചോലയെ കുറിച്ച് പറയുന്നത്. സംവിധായകൻ സനൽ കുമാർ ശശിധരന്റെ വാക്കുകൾ ഇങ്ങനെ, “ചോല ബൗദ്ധിക വ്യാപാരങ്ങളെ മാത്രം സന്തോഷിപ്പിക്കേണ്ട സിനിമയല്ല, വർത്തമാന യാഥാർഥ്യങ്ങളിൽ അലോസരപ്പെടുത്തുന്ന സിനിമ കൂടിയാണ്”.

കാമുകനൊപ്പം പട്ടണം കാണാൻ വീട്ടുകാർ അറിയാതെ ഒരു സുപ്രഭാതത്തിൽ പുറപ്പെടുന്ന ജാനകി എന്ന കൗമാരക്കാരിയുടെ ജീവിതത്തിൽ സംഭവിക്കുന്ന കാര്യങ്ങൾ ആണ് ഈ ചിത്രം നമ്മുടെ മുന്നിൽ എത്തിക്കുന്നത്. ജാനകി ആയി നിമിഷ സജയനും ആ കഥാപാത്രത്തിന്റെ കാമുകൻ ആണ് പുതുമുഖം അഖിൽ വിശ്വനാഥും അവരെ കൊണ്ട് പോകുന്ന കാമുകന്റെ ആശാൻ ആയി ജോജു ജോർജും ആണ് അഭിനയിക്കുന്നത്. അഭിനേതാക്കൾ ഓരോരുത്തരും ഗംഭീര പ്രകടനം കാഴ്ച വെച്ച ഈ ചിത്രം വലിയ സ്വീകരണം ആണ് നേടിയെടുത്തിരിക്കുന്നതു. അന്താരാഷ്ട്ര ചലച്ചിത്ര മേളകളിൽ നിന്ന് നേടിയെടുത്ത ഗംഭീര പ്രതികരണം ഇപ്പോൾ കേരളത്തിലെ സാധാരണ പ്രേക്ഷകരിൽ നിന്നുകൂടി നേടിയെടുത്തു കൊണ്ട് വിജയത്തിലേക്ക് കുതിക്കുകയാണ് ചോല.