ലൂസിഫർ തെലുങ്കിൽ ചെയ്യാൻ മെഗാ സ്റ്റാർ ചിരഞ്ജീവി..!

സൗത്ത് ഇന്ത്യൻ സിനിമയുടെ മെഗാ സ്റ്റാർ ആയ ചിരഞ്ജീവി അഭിനയിച്ച പുതിയ ബ്രഹ്മാണ്ഡ ചിത്രമാണ് സൈ രാ നരസിംഹ റെഡ്ഢി. വമ്പൻ ബഡ്ജറ്റിൽ ഒരുക്കിയ ഈ ചിത്രം നിർമ്മിച്ചിരിക്കുന്നത് അദ്ദേഹത്തിന്റെ മകൻ ആയ റാം ചരൺ തന്നെയാണ്. തെലുങ്കിൽ ഒരുക്കിയിരിക്കുന്ന സിനിമ, തമിഴ്, മലയാളം, ഹിന്ദി ഭാഷകളിൽ ഡബ്ബ് ചെയ്തിട്ടുമുണ്ട്. രജനികാന്ത്, മോഹൻലാൽ, പവൻ കല്യാൺ എന്നിവർ ആണ് ഇതിന്റെ തമിഴ്, മലയാളം, തെലുങ്ക് വേർഷനുകൾക്ക്‌ വേണ്ടി വിവരണം നൽകിയിരിക്കുന്നത്. ഇപ്പോൾ ഇതിന്റെ മലയാളം പതിപ്പിന്റെ പ്രമോഷന് വേണ്ടി കൊച്ചിയിൽ വന്ന ചിരഞ്ജീവി മോഹൻലാൽ ചിത്രം ലൂസിഫറിനെ കുറിച്ചും അതിന്റെ സംവിധായകനായ പൃഥ്വിരാജ് സുകുമാരനെ കുറിച്ചും പറഞ്ഞ വാക്കുകൾ ആണ് ശ്രദ്ധ നേടുന്നത്. ലൂസിഫർ എന്ന പൃഥ്വിരാജ് ചിത്രത്തിന്റെ തെലുങ്കു റീമേക് റൈറ്റ് മേടിച്ചിരിക്കുന്നതു ചിരഞ്ജീവി ആണ്.

പൃഥ്വിരാജ് കൂടി പങ്കെടുത്ത ചടങ്ങിൽ വെച്ചാണ് ചിരഞ്ജീവി മനസ്സ് തുറന്നതു. അയ്യാ എന്ന ഹിന്ദി ചിത്രത്തിലൂടെ ആണ് പൃഥ്വിരാജ് എന്ന നടനെ താൻ ആദ്യമായി കാണുന്നത് എന്നും എത്ര സുമുഖനാണ്‌ ഇയാൾ എന്നാണ് ആദ്യം തോന്നിയത് എന്നും ചിരഞ്ജീവി പറയുന്നു. തന്റെ പുതിയ ചിത്രത്തിൽ പൃഥ്വിരാജ് ഒരു വേഷം ചെയ്യണം എന്ന് ആഗ്രഹിച്ചിരുന്നു എന്നും എന്നാൽ മറ്റൊരു ചിത്രത്തിന്റെ ഷൂട്ടിങ് ആയി ബന്ധപെട്ടു പൃഥ്‌വിക്കു ഇതിന്റെ ഭാഗം ആവാൻ കഴിഞ്ഞില്ല എന്നും അദ്ദേഹം പറഞ്ഞു. ആടു ജീവിതം എന്ന സിനിമയിൽ അഭിനയിക്കുന്നത് കൊണ്ടായിരുന്നു നരസിംഹ റെഡ്‌ഡിയിലെ വേഷം പൃഥ്‌വിക്കു ചെയ്യാൻ കഴിയാതെ ഇരുന്നത്. ലൂസിഫർ തെലുങ്ക് റീമേക് ചിരഞ്ജീവി ചെയ്യും എന്ന് തന്നെയാണ് താൻ പ്രതീക്ഷിക്കുന്നത് എന്നും പൃഥ്വിരാജ് പറഞ്ഞു.