ചേതൻ ജയലാലിന്റെ മികച്ച പ്രകടനവുമായി സുഖമാണോ ദാവീദേ ഇന്ന് മുതൽ തീയേറ്ററുകളിൽ..!

ബാല താരം ചേതൻ ജയലാലിന്റെ മറ്റൊരു മികച്ച പ്രകടനവുമായി എത്തുന്ന ചിത്രമാണ് സുഖമാണോ ദാവീദേ. ഇരട്ട സംവിധായകർ ആയ അനുപ് ചന്ദ്രൻ- രാജ മോഹൻ ടീം ഒരുക്കിയ ഈ ചിത്രം ഇന്ന് മുതൽ കേരളത്തിലെ തീയേറ്ററുകളിൽ എത്തുകയാണ്. ടോമി കിരിയന്തൻ ആണ് പാപ്പി ക്രീയേഷന്സിന്റെ ബാനറിൽ ഈ ഫാമിലി എന്റെർറ്റൈനെർ നിർമ്മിച്ചിരിക്കുന്നത്. ഭഗത് മാനുവലും പ്രധാന വേഷത്തിൽ എത്തുന്ന ഈ ചിത്രത്തിന്റെ പോസ്റ്റർ ക്യാപ്ഷൻ പറയുന്നത് ഒരാളുടെ ഹീറോ അയാളുടെ വീട്ടിൽ തന്നെ വേണം എന്നാണ്. കൃഷ്ണ പൂജപ്പുര ആണ് ഈ ചിത്രത്തിന് തിരക്കഥ രചിച്ചിരിക്കുന്നത്. ചേതൻ ജയലാൽ അവതരിപ്പിക്കുന്ന കഥാപാത്രത്തിന്റെ ചേട്ടൻ ആയാണ് ഭഗത് മാനുവൽ ഈ ചിത്രത്തിൽ അഭിനയിക്കുന്നത്. അവർ ചെന്ന് ചാടുന്ന ചില പ്രശ്നങ്ങളും അതിന്റെ പരിഹരിക്കലുമാണ് ഈ ചിത്രം നമ്മളോട് പറയുന്ന കഥ.

സജിത്ത് മേനോൻ ദൃശ്യങ്ങൾ ഒരുക്കിയിരിക്കുന്ന ഈ ചിത്രത്തിന് സംഗീതം നൽകിയിരിക്കുന്നത് പ്രശസ്ത സംഗീത സംവിധായകനായ മോഹൻ സിതാര ആണ്. ഷൈജൽ പിവി എഡിറ്റിംഗ് നിർവഹിച്ചിരിക്കുന്ന ഈ ചിത്രത്തിലെ ഗാനങ്ങൾക്ക് വരികൾ എഴുതിയിരിക്കുന്നത് കൈതപ്രം ആണ്. ചേതൻ ജയലാൽ, ഭഗത് മാനുവൽ എന്നിവർക്ക് ഒപ്പം പ്രിയങ്ക, സുധീർ കരമന, നന്ദു, താര കല്യാൺ, ബിജു കുട്ടൻ, മഞ്ജു സതീഷ്, നോബി, വിജിലേഷ് , ആര്യ എന്നിവരും അഭിനയിക്കുന്നുണ്ട്. ഏതായാലും പ്രേക്ഷകരെ നിരാശരാക്കാത്ത ഒരു ചിത്രമായിരിക്കും ഇതെന്ന് നമ്മുക്ക് പ്രതീക്ഷിക്കാം.