കമൽ ഹാസൻ ചിത്രത്തിൽ വില്ലനായി ചെമ്പൻ വിനോദ്; വമ്പൻ താരനിരയുമായി വിക്രം..!

തമിഴകത്തിന്റെ ഉലക നായകൻ കമൽ ഹാസൻ നായകനായി എത്തുന്ന പുതിയ ചിത്രമാണ് വിക്രം. മാസ്റ്ററിനു ശേഷം ലോകേഷ് കനകരാജ് സംവിധാനം ചെയ്യുന്ന ഈ ചിത്രത്തിൽ വമ്പൻ താരനിരയാണ് അണിനിരക്കുന്നത്. മലയാളത്തിൽ നിന്ന് ഫഹദ് ഫാസിൽ, തമിഴിൽ നിന്ന് മക്കൾ സെൽവൻ വിജയ് സേതുപതി എന്നിവരും ഈ ചിത്രത്തിന്റെ താരനിരയിൽ ഉണ്ട്. ഇപ്പോൾ വരുന്ന റിപ്പോർട്ടുകൾ പ്രകാരം ഈ ചിത്രത്തിലെ വില്ലനായി എത്തുന്നത് മറ്റൊരു മലയാളി നടൻ ആയ ചെമ്പൻ വിനോദ് ജോസ് ആണ്. ചെമ്പൻ വിനോദിന് പുറമെ കാളിദാസ് ജയറാം, നരെയ്ൻ എന്നിവരും ഈ ചിത്രത്തിലഭിനയിക്കുന്ന മലയാളി താരങ്ങളാണ്. അഭിനേതാക്കള്‍ മാത്രമല്ല, വിക്രമിന്റെ ഛായാഗ്രാഹകനും ഒരു മലയാളിയാണ്. ജെല്ലിക്കെട്ട്, അങ്കമാലി ഡയറീസ് തുടങ്ങിയ ചിത്രങ്ങൾക്ക് ക്യാമറ ചലിപ്പിക്കുകയും അതുപോലെ ദേശീയ അവാർഡ് നേടുകയും ചെയ്ത ഗിരീഷ് ഗംഗാധരൻ ആണ് ആ ക്യാമറാമാൻ. ചെമ്പൻ വിനോദ് പ്രധാന വേഷങ്ങളിൽ എത്തുന്ന ഒട്ടേറെ മലയാള ചിത്രങ്ങളും ഇപ്പോൾ ഒരുങ്ങുന്നുണ്ട്.

അദ്ദേഹം തന്നെ രചന നിർവഹിച്ച ഭീമന്റെ വഴിയാണ് ഇനി പുറത്തു വരാനുള്ള പ്രധാന ചിത്രം. കുഞ്ചാക്കോ ബോബനും ഈ ചിത്രത്തിൽ പ്രധാന വേഷം ചെയ്യുന്നുണ്ട്. ആഷിക് അബു, റിമാ കല്ലിങ്കല്‍, ചെമ്പന്‍ വിനോദ് എന്നിവര്‍ ചേർന്ന് നിർമ്മിച്ച ഈ ചിത്രം സംവിധാനം ചെയ്തിരിക്കുന്നത് അഷ്‌റഫ് ഹംസയാണ്. ഗിരീഷ് ഗംഗാധരന്‍ തന്നെയാണ് ഭീമന്റെ വഴിക്കും ക്യാമറ ചലിപ്പിച്ചിരിക്കുന്നതു. ഖാലിദ് റഹ്മാന്റെ തല്ലുമാല എന്ന ചിത്രത്തിലും ചെമ്പന്‍ വിനോദ് പ്രധാന കഥാപാത്രത്തെ അവതരിപ്പിച്ചിട്ടുണ്ട്. ടോവിനോ തോമസ് നായക വേഷം ചെയ്യുന്ന ഈ ചിത്രത്തിലെ നായികാ വേഷം ചെയ്യുന്നത് കല്യാണി പ്രിയദർശൻ ആണ്. ആഷിക് ഉസ്മാൻ ആണ് ഈ ചിത്രം നിർമ്മിക്കുന്നത്.