ഇരട്ട ചങ്കുള്ള സഖാവ് ; ആവേശം നിറച്ചു മമ്മൂട്ടിയുടെ പുതിയ രൂപം ആരാധകന്റെ ഭാവനയിൽ

സാനി യാസ് എന്ന കലാകാരൻ ഇതിനോടകം സോഷ്യൽ മീഡിയയിൽ തന്റെ പോസ്റ്റർ ഡിസൈനിങ് പ്രതിഭ കൊണ്ട് ഏറെ പ്രശസ്തനാണ്. മലയാള സിനിമയിലെ താരങ്ങളെ പല പ്രശസ്ത വ്യക്തിത്വങ്ങളുടെ രൂപത്തിൽ സാനി യാസ്‌ ഡിസൈൻ ചെയ്‌ത്‌ ആ പോസ്റ്ററുകൾ പുറത്തു എത്തുമ്പോൾ ആ വേഷത്തിൽ ആ താരങ്ങളെ വെള്ളിത്തിരയിൽ കാണാൻ നമ്മുക്ക് തോന്നിപോകും എന്നതാണ് ഈ പ്രതിഭയുടെ മികവ്. മമ്മൂട്ടിയെയും ദുൽകർ സൽമാനെയും ഫിഡൽ കാസ്ട്രോ ആയി ചിത്രീകരിച്ച സാനി യാസിന്റെ പോസ്റ്ററുകൾ കുറച്ചു നാൾ മുൻപ് സോഷ്യൽ മീഡിയ മുഴുവൻ വൈറൽ ആയി മാറിയിരുന്നു. ഇപ്പോഴിതാ മമ്മൂട്ടിയെ തന്നെ മറ്റൊരു രൂപത്തിൽ തന്റെ പോസ്റ്ററിലൂടെ അവതരിപ്പിക്കുകയാണ് സാനി യാസ്‌.

ഇത്തവണ സാനി യാസിന്റെ ഭാവനയിലൂടെ വിരിഞ്ഞ മമ്മൂട്ടിയുടെ രൂപം കേരളാ മുഖ്യമന്തി സഖാവ് പിണറായി വിജയൻറെ ആണ്. വിരട്ടലും വിലപേശലും ചങ്കുറപ്പോടെ നേരിട്ട ഇരട്ട ചങ്കുള്ള സഖാവ്, പിണറായിയിലെ സഖാവ്, പേര് വിജയൻ എന്ന് പറഞ്ഞിരിക്കുന്ന പോസ്റ്ററിൽ പിണറായി വിജയൻ ആയി ആണ് മെഗാ സ്റ്റാർ മമ്മൂട്ടിയുടെ രൂപത്തെ സാനി യാസ് മാറ്റി എടുത്തിരിക്കുന്നത്. ഗംഭീരം എന്ന വാക്കിൽ ഒതുക്കാവുന്നതല്ല ഈ കലാകാരൻ ഒരുക്കിയ പോസ്റ്റർ എന്ന് പറയാതെ വയ്യ. അത്ര മികച്ച നിലവാരമാണ് അദ്ദേഹത്തിന്റെ പോസ്റ്ററുകൾ പുലർത്തുന്നത്. പോസ്റ്ററുകൾ കണ്ടാൽ ഇങ്ങനെ ഒരു ചിത്രം വന്നിരുന്നെങ്കിൽ എന്ന് പ്രേക്ഷകരും ഇങ്ങനെയൊരു ചിത്രത്തിന്റെ സാധ്യതകളെ പറ്റി എഴുത്തുകാരും സംവിധായകരും വരെ ആലോചിച്ചു പോകും എന്നതാണ് ഒരു സാനി യാസ്‌ ചിന്ത എന്ന പേരിൽ പുറത്തു വരുന്ന പോസ്റ്ററുകളുടെ പ്രത്യേകത.