വ്യത്യസ്തമായ കാരക്ടർ പോസ്റ്ററുകളുമായി ഒരു കടത്തു നാടൻ കഥ; ചിത്രം ഉടൻ തീയേറ്ററുകളിൽ..!

നവാഗത സംവിധായകൻ ആയ പീറ്റർ സാജൻ രചനയും സംവിധാനവും നിർവഹിച്ച ഒരു കടത്തു നാടൻ കഥ എന്ന ചിത്രത്തിന്റെ കാരക്ടർ പോസ്റ്ററുകൾ ആണ് ഇപ്പോൾ സോഷ്യൽ മീഡിയയുടെ ശ്രദ്ധ നേടിയെടുക്കുന്നത്. ജനപ്രിയ നായകൻ ദിലീപ് റിലീസ് ചെയ്ത ഇതിന്റെ ഫസ്റ്റ് ലുക്ക് പോസ്റ്ററും ഏറെ ശ്രദ്ധ നേടിയിരുന്നു. ഇപ്പോൾ ഇതിന്റെ കാരക്ടർ പോസ്റ്ററുകൾ ശ്രദ്ധ നേടുന്നത് അതിന്റെ വ്യത്യസ്തമായ ഡിസൈനിങ്ങിലൂടെ ആണ്. ആധാർ കാർഡിന്റെ രൂപത്തിൽ ആണ് ഇതിലെ കാരക്ടർ പോസ്റ്ററുകൾ പുറത്തു വിട്ടിരിക്കുന്നത്. ഇപ്പോൾ പുറത്തു വന്നിരിക്കുന്നത് പ്രസീദ, നോബി, സുധീർ കരമന എന്നിവർ അവതരിപ്പിക്കുന്ന കഥാപാത്രങ്ങളുടെ പോസ്റ്ററുകൾ ആണ്. അക്കാമ്മ, ജബ്ബാർ, ഷാജി എന്നീ കഥാപാത്രങ്ങളെ ആണ് ഇവർ ഈ ചിത്രത്തിൽ അവതരിപ്പിക്കുന്നത്. കഥാപാത്രങ്ങളുടെ മുഴുവൻ വിവരങ്ങളും ഈ പോസ്റ്ററുകളിൽ നമ്മുക്ക് കാണാൻ സാധിക്കും എന്നതാണ് ഇതിലെ പുതുമ.

സന്തോഷ് പണ്ഡിറ്റിന്റെ ആരാധകൻ ആയ പണ്ഡിറ്റ് മമ്മാലി എന്ന് പേരുള്ള ഓട്ടോ ഡ്രൈവർ ആയി ഈ ചിത്രത്തിൽ എത്തുന്ന സലിം കുമാറിന്റെ കഥാപാത്രത്തെ കുറിച്ചും നേരത്തെ റിപ്പോർട്ടുകൾ പുറത്തു വന്നിരുന്നു. ഷഹീൻ സിദ്ദിഖ് നായകനായി അഭിനയിക്കുന്ന ഈ ചിത്രത്തിൽ ഒരു വമ്പൻ താര നിര തന്നെ അണിനിരക്കുന്നുണ്ട്. പ്രദീപ് റാവത്, ബിജു കുട്ടൻ, ശശി കലിംഗ, കോട്ടയം പ്രദീപ്, സാജൻ പള്ളുരുത്തി, എഴുപുന്ന ബൈജു, അബു സലിം, പ്രശാന്ത് പുന്നപ്ര, അഭിഷേക്, രാജ്‌കുമാർ, ജയാ ശങ്കർ, ആര്യ അജിത്, സാവിത്രി ശ്രീധരൻ, സരസ ബാലുശ്ശേരി, അഞ്ജന അപ്പുക്കുട്ടൻ, രാംദാസ് തിരുവില്വാമല, ഷഫീക് എന്നിവരും അഭിനയിക്കുന്ന ഈ ചിത്രം ഒരു ത്രില്ലർ ആയാണ് ഒരുക്കിയിരിക്കുന്നത്.