ക്ലീൻ യു സർട്ടിഫിക്കറ്റ് നേടി സിബിഐ 5 ; റിലീസ് തീയതി ഉടൻ..!

മെഗാ സ്റ്റാർ മമ്മൂട്ടി നായകനായി എത്തുന്ന ഏറ്റവും പുതിയ ചിത്രമാണ് സിബിഐ 5 ദി ബ്രെയിൻ. കെ മധു സംവിധാനം ചെയ്തിരിക്കുന്ന ഈ ചിത്രം രചിച്ചത് എസ് എൻ സ്വാമി ആണ്. ഇതിന്റെ ടീസർ, പോസ്റ്ററുകൾ എന്നിവയെല്ലാം സോഷ്യൽ മീഡിയയിൽ ഏറെ ശ്രദ്ധ നേടുന്നുണ്ട്. വളരെയധികം ജനശ്രദ്ധ നേടിയ ഒരു സിബിഐ ഡയറികുറിപ്പ്, ജാഗ്രത, സേതുരാമയ്യർ സിബിഐ, നേരറിയാൻ സിബിഐ എന്നിവക്ക് ശേഷം ആ സീരീസിൽ പുറത്തു വരാൻ പോകുന്ന അഞ്ചാമത്തേയും അവസാനത്തേയും ചിത്രമാണ് സിബിഐ 5, ദി ബ്രെയിൻ. ഇപ്പോഴിതാ, ഈ ചിത്രത്തിന്റെ സെൻസറിങ് പൂർത്തിയായി എന്ന വിവരമാണ് വരുന്നത്. ക്ലീൻ യു സർട്ടിഫിക്കറ്റ് നേടിയ ഈ ചിത്രത്തിന്റെ ദൈർഘ്യം രണ്ടു മണിക്കൂർ മുപ്പത്തിയേഴു മിനിറ്റ് ആണെന്നും ഏറ്റവും പുതിയ റിപ്പോർട്ടുകൾ പറയുന്നു. ഇനി ഈ ചിത്രത്തിന്റെ ട്രൈലെർ, റിലീസ് തീയതി എന്നിവക്കാണ് പ്രേക്ഷകർ കാത്തിരിക്കുന്നത്.

വരുന്ന മെയ് ഒന്നിന് ആവും ഈ ചിത്രം പുറത്തു വരിക എന്നാണ് സൂചന. തൊട്ടടുത്ത ദിവസം ഈദ് അവധി ആയതിനാൽ ആണ് ഈ ചിത്രം ഞായറാഴ്ച റിലീസ് നോക്കുന്നത് എന്നും വാർത്തകൾ വരുന്നുണ്ട്. ഏതായാലും ഈദ് റിലീസ് ആയി സിബിഐ എത്തുമെന്ന് ഉറപ്പായി കഴിഞ്ഞു. അഖിൽ ജോർജ് കാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് ശ്രീകർ പ്രസാദ് ആണ്. യുവനിരയിലെ ശ്രദ്ധേയനായ ജേക്സ് ബിജോയ് ആണ് ഈ ചിത്രത്തിന്റെ സംഗീത സംവിധായകൻ. സ്വർഗ്ഗചിത്രയുടെ ബാനറിൽ അപ്പച്ചൻ നിർമ്മിക്കുന്ന ഈ ചിത്രത്തിൽ മമ്മൂട്ടിയോടൊപ്പം ഒരു വലിയ താരനിര തന്നെ അണിനിരക്കുന്നുണ്ട്.