മാമാങ്കത്തിന് എതിരായ വ്യാജ പ്രചാരണം; സജീവ് പിള്ള അടക്കം 8 പേർക്കെതിരെ പോലീസ് കേസ്

മമ്മൂട്ടി നായകനായി എത്തുന്ന മാമാങ്കം എന്ന ചിത്രം അടുത്ത മാസം 12 ന് റിലീസ് ചെയ്യും. മലയാളം, തമിഴ്, തെലുങ്കു, ഹിന്ദി ഭാഷകളിൽ ആയി റിലീസ് ചെയ്യാൻ പോകുന്ന ഈ ചിത്രം സംവിധാനം ചെയ്തത് എം പദ്മകുമാറും നിർമ്മിച്ചത് കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളിയും ആണ്. കുറച്ചു ദിവസങ്ങൾക്കു മുൻപ് സോഷ്യൽ മീഡിയയിലൂടെ വ്യാജ പ്രചാരണം നടത്തി ഈ സിനിമയെ തകർക്കാൻ ചിലർ സംഘടിതമായി ശ്രമിക്കുന്നു എന്ന് പറഞ്ഞു കാവ്യാ ഫിലിംസ് പോലീസിൽ കേസ് ഫയൽ ചെയ്തിരുന്നു. 55 കോടി രൂപ മുതൽ മടക്കി എടുത്ത ഈ ചിത്രത്തിൽ തങ്ങൾക്കു ഏറെ പ്രതീക്ഷകൾ ഉണ്ടെന്നും റിലീസ് ചെയ്യാത്ത ചിത്രം മോശം ആണെന്ന് ചിലർ മനപ്പൂർവം പറഞ്ഞു പരത്തുകയാണ് എന്നായിരുന്നു പരാതി.

ആ പരാതിയിന്മേൽ ഇപ്പോൾ ഈ ചിത്രത്തിന്റെ മുൻ തിരക്കഥാകൃത്തായ സജീവ് പിള്ള അടക്കം ഒൻപതു പേർക്കെതിരെ കേസ് എടുത്തതായി ആണ് റിപ്പോർട്ടുകൾ പറയുന്നത്. സജീവ് പിള്ള ആയിരുന്നു ഈ ചിത്രത്തിന്റെ തിരക്കഥ രചിച്ചു സംവിധാനം ചെയ്യാൻ ആരംഭിച്ചത്. അതിനു ശേഷം നിർമ്മാതാവുമായുണ്ടായ ചില പ്രശ്നങ്ങൾ മൂലം അദ്ദേഹത്തെ ഈ ചിത്രത്തിൽ നിന്നൊഴിവാക്കിയാണ് എം പദ്മകുമാറിനെ ഈ ചിത്രം സംവിധാനം ചെയ്യാൻ ഉള്ള ചുമതല ഏൽപ്പിച്ചത്. ശങ്കർ രാമകൃഷ്ണൻ ആണ് ഇപ്പോൾ ഈ ചിത്രത്തിന്റെ അവലംബിത തിരക്കഥ രചിച്ചിരിക്കുന്നത്. മമ്മൂട്ടിയോടൊപ്പം ഉണ്ണി മുകുന്ദൻ, മാസ്റ്റർ അച്യുതൻ, പ്രാചി ടെഹ്‌ലൻ, അനു സിതാര, കനിഹ, സുദേവ് നായർ, തരുൺ അറോറ, സിദ്ദിഖ്, ഇനിയ, മണിക്കുട്ടൻ, മണികണ്ഠൻ ആചാരി എന്നിവരും ഈ ചിത്രത്തിന്റെ താര നിരയിൽ ഉണ്ട്.