വീണ്ടും പൃഥ്വിരാജ് ചിത്രം ആമസോണ്‍ പ്രൈമിന്; ഭ്രമം റിലീസ് ഡേറ്റ് പ്രഖ്യാപിച്ചു

പൃഥ്വിരാജും ഉണ്ണി മുകുന്ദനും മുഴുനീള വേഷങ്ങളിൽ ഒരുമിക്കുന്ന ആദ്യചിത്രമാണ് ‘ഭ്രമം. പ്രമുഖ ഛായാഗ്രഹകന്‍ രവി കെ ചന്ദ്രന്‍ ആദ്യമായി സംവിധാനം ചെയ്യുന്ന ചിത്രം കൂടിയാണിത്. എ.പി ഇന്റര്‍നാഷണല്‍, വയാകോം18 സ്റ്റുഡിയോസ് എന്നിവ സംയുക്തമായി നിര്‍മ്മിച്ച ഭ്രമം. 2018ൽ പുറത്തിറങ്ങിയ ശ്രീരാം രാഘവൻ സംവിധാനം ചെയ്ത് ആയുഷ്മമാൻ ഖുറാന പ്രധാന വേഷത്തിലെത്തിയ ‘അന്ധാധുനി’ന്‍റെ റീമേക്ക് ആണ് എന്ന് നേരത്തെ റിപ്പോർട്ടുകൾ പുറത്തു വന്നിരുന്നു.

പൃഥ്വിരാജ്, ഉണ്ണി മുകുന്ദന്‍, മമ്ത മോഹന്‍ദാസ് എന്നിവര്‍ ഒന്നിച്ചെത്തുന്ന ഈ ചിത്രം ആമസോണ്‍ പ്രൈമില്‍ ഒക്ടോബര്‍ 7നാണ് റിലീസ് ചെയ്യുന്നത്. കോള്‍ഡ് കേസ്,കുരുതി എന്നീ ചിത്രങ്ങളുടെ വമ്പൻ സ്വീകാര്യയെക്കു ശേഷം വീണ്ടും പൃഥ്വിരാജുമായി സഹകരിക്കാന്‍ കഴിഞ്ഞതില്‍ സന്തോഷമുണ്ടെന്ന് ആമസോണ്‍ പ്രൈം വീഡിയോയുടെ കണ്ടെന്റ് ഡയറക്ടര്‍ വിജയ് സുബ്രമണ്യം അറിയിച്ചു.

രവി കെ. ചന്ദ്രന്‍ തന്നെ ഛായാഗ്രഹണം നിർവഹിച്ചിരിക്കുന്ന ഈ ചിത്രത്തിന്റെ തിരക്കഥ ശരത് ബാലന്‍റേതാണ്. എഡിറ്റിംഗ് ശ്രീകര്‍ പ്രസാദ് നിർവഹിക്കുമ്പോൾ സംഗീതം ജേക്സ് ബിജോയിയും. റാഷി ഖന്ന, അനന്യ, സുരഭി ലക്ഷ്മി, ശങ്കര്‍, ജഗദീഷ്, സുധീര്‍ കരമന തുടങ്ങിയവരും ചിത്രത്തിൽ പ്രധാന വേഷത്തിൽ അഭിനയിക്കുന്നു.