പണ്ട് കമൽ ഹാസൻ ചെയ്തിട്ടുണ്ട്; എന്നാൽ ഇത് അതിലും വ്യത്യസ്തം; എലോണിനെ കുറിച്ചുള്ള വിവരങ്ങൾ പുറത്തു വിട്ട് മോഹൻലാൽ

മലയാളത്തിന്റെ മഹാനടൻ, കംപ്ലീറ്റ് ആക്ടർ മോഹൻലാൽ തന്റെ പുതിയ രണ്ടു ചിത്രങ്ങളെ കുറിച്ച് പുറത്തു വിട്ട അപ്‌ഡേറ്റുകളാണ് ഇപ്പോൾ ശ്രദ്ധ നേടുന്നത്. ഏഷ്യാനെറ്റ് ന്യൂസ്, മനോരമ ന്യൂസ് എന്നിവക്ക് ഓണം പ്രമാണിച്ചു നൽകിയ അഭിമുഖങ്ങളിലാണ് തന്റെ വരാനിരിക്കുന്ന എലോൺ, മോൺസ്റ്റർ എന്നീ ചിത്രങ്ങളെ കുറിച്ച് മോഹൻലാൽ വെളിപ്പെടുത്തിയത്. അതിൽ തന്നെ എലോൺ എന്ന ചിത്രത്തെ കുറിച്ചദ്ദേഹം പറഞ്ഞ വാക്കുകൾ ഏറെ ശ്രദ്ധ നേടി. വളരെ വ്യത്യസ്‌തമായ ഒരു ചിത്രമാണ് എലോൺ എന്നും ഇത്തരം ചിത്രങ്ങൾ നേരത്തെ കമൽ ഹാസനൊക്കെ ചെയ്തിട്ടുണ്ടെങ്കിലും, അതിൽ നിന്നും കുറച്ചു കൂടി മാറിയാണ് എലോൺ ഒരുക്കിയിരിക്കുന്നതെന്നും മോഹൻലാൽ പറയുന്നു. ഈ ചിത്രത്തിൽ താൻ ഒരാൾ മാത്രമാണ് അഭിനയിച്ചിട്ടുള്ളുവെന്നും, വളരെ മികച്ച രീതിയിൽ തന്നെ ഷാജി കൈലാസ് ഈ ചിത്രം ഒരുക്കിയിട്ടുണ്ടെന്നും മോഹൻലാൽ പറയുന്നു. ഇത് കാണേണ്ട ഒരു ചിത്രമായിരിക്കുമെന്നും കോവിഡിൻ്റെ പാശ്ചാത്തലത്തിൽ സംഭവിക്കുന്ന ഒരു കഥയാണ് എലോൺ പറയുന്നതെന്നും മോഹൻലാൽ അറിയിച്ചു.

അതുപോലെ മോഹൻലാൽ എടുത്തു പറഞ്ഞ ഒരു ചിത്രമാണ് വൈശാഖ് സംവിധാനം ചെയ്ത മോൺസ്റ്റർ. മലയാളത്തിൽ ഇതുവരെ പറയാൻ ശ്രമിക്കാത്ത ഒരു പ്രമേയമാണ് മോൺസ്റ്റർ പറയുന്നതെന്നും, അതിലെ ആക്ഷനൊക്കെ വളരെ വ്യത്യസ്തമായും ഗംഭീരമായും വൈശാഖ് ഒരുക്കിയിട്ടുണ്ടെന്നും മോഹൻലാൽ പറയുന്നു. ഈ രണ്ടു ചിത്രങ്ങളും റിലീസ് ചെയ്യാൻ റെഡി ആയാണിരിക്കുന്നതെന്നും മോഹൻലാൽ പറഞ്ഞു. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ഈ രണ്ടു ചിത്രങ്ങളും നിർമ്മിച്ചിരിക്കുന്നത്. ഒടിടിക്ക് വേണ്ടിയാണു ഈ ചിത്രങ്ങൾ നിർമ്മിച്ചിരിക്കുന്നതെന്നാണ് സൂചന. അതിൽ മോൺസ്റ്റർ തീയേറ്ററിൽ വരാനും സാധ്യതയുണ്ടെന്ന് റിപ്പോർട്ടുകളുണ്ട്. എലോൺ എന്ന ചിത്രം രചിച്ചത് രാജേഷ് ജയരാമനും മോൺസ്റ്റർ രചിച്ചത് ഉദയ കൃഷ്ണയുമാണ്. വളരെ വ്യത്യസ്തമായ ലുക്കുകളിലാണ് ഈ ചിത്രങ്ങളിൽ മോഹൻലാൽ പ്രത്യക്ഷപ്പെടുന്നത്.